پاور ڈویژن اور جرمنی کے ادارے جی آئی زیڈ کے درمیان معاہدہ طے پاگیا

تفصیلات کے مطابق معاہدے پر دستخط کی تقریب میں سیکرٹری پاور ڈویژن علی رضا بھٹہ اور جی آئی زیڈ کے کنٹری ڈائریکٹر نے معاہدے کی تقریب میں شرکت کی ۔ پاور ڈویژن کے اعلامیے کے مطابق اس اہم معاہدے کے تحت جی آئی زیڈ متبادل توانائی کے شعبے میں وزارت توانائی اور اس کے اداروں کو تکنیکی معاونت فراہم کرے گا ۔اس منصوبے کا مقصد پاکستان میں توانائی کے شعبے میں بہتری لانے میں مدد فراہم کرنا ہے۔

سیکرٹری پاور ڈویژن  کا کہنا تھا کہ سی سی آئی سے منظور ہونے والی نئی متبادل توانائی پالیسی ملکی توانائی کے شعبے میں ایک سنگ میل ہے۔ متبادل توانائی پالیسی سے 2030 تک متبادل ذرائع سے 30 فیصد بجلی پیدا کی جائے گی۔ سیکرٹری پاورڈویژن نے متبادل ذرائع سے بجلی کی پیداوار میں بہتری کے لئے پاکستان کی استعدادکار بڑھانے پر بھی زور دیا ہے ۔ ان کا کہنا تھا کہ جی آئی زیڈ اور وزارت توانائی کے درمیان تعاون سے متبادل ذرائع سے پیداوار میں بہتری لانے میں مدد ملے گی ۔

 اس موقع پر کنٹری ڈائریکٹر جی آئی زیڈ نے کہا کہ معاہدے سے کلین انرجی ٹیکنالوجیز کی ترقی میں مدد ملے گی ،اس منصوبے سے پاکستان کی دیہی علاقوں میں بجلی فراہمی کی حکمت عملی میں مددملے گی ۔ کنٹری ڈائریکٹر کا مزید کہناتھا کہ قومی گرڈ سے منسلک سولر پاور پلانٹس کی پروموشن میں بھی  مددملے گی۔