کچے کے ڈاکوؤں پر پہلی بار ڈرون سے حملے،9 ڈاکو ہلاک

پولیس کے مطابق شکارپور میں کچے کے ڈاکوؤں پرپہلی بار ڈرون سے حملہ کیا گیا ہے جو کہ  کارگر ثابت ہوا۔ پانچ روز کے کامیاب آپریشن میں 9 ڈاکو ہلاک اور 45 زخمی ہو چکے ہیں۔

پولیس حکام کے مطابق دریائے سندھ  میں پانی آنے کے سبب کچے کے علاقوں میں بکتر بندگاڑیوں کی رسائی ممکن نہیں رہی تھی، جس کے بعد پہلی مرتبہ پولیس اور رینجرز نے ڈرون کی مدد سے کچے میں ڈاکوؤں کے ٹھکانوں تک پہنچنے میں کامیابی حاصل کی۔

پولیس کا کہنا ہے کہ پہلی بار  کچے کے ڈاکوؤں میں خوف و ہراس  دیکھنے میں آیا ہےاور ڈاکو اب آئی پی سی اور بکتر بند سے زیادہ ڈرون سے خوفزدہ ہیں۔

سندھ پولیس کے مطابق مشترکہ آپریشن میں پولیس اور رینجرز نے کافی حد تک کامیابی حاصل کر لی ہے۔ اور کئی ڈاکو مارے جا چکے ہیں۔ چند روز قبل ڈرون شیلنگ سے بدنام ڈاکو بیلوتیغانی بھی شدید زخمی ہوا تھا۔

پولیس کے مطابق اگرآپریشن اس طرع جاری رہا تو کچے میں ڈاکوؤں کا صفایا ہوجائے گا۔ اب کچے سے کلین سویپ کے بعد ہی باہر آئیں گے اور کچے کا علاقہ کلیئر کروالیں گے۔