کراچی کے متعدد گرڈ اسٹیشن ٹرپ گئے، شہر کے کئی علاقے بجلی سے محروم

کراچی:کراچی الیکٹرک کی ایکسٹرا ہائی ٹینشن لائن میں ٹرپنگ کی وجہ سے شہر کے کئی گرڈ اسٹیشن ٹرپ کر گئے، جس کے باعث شہر کے بڑے حصے میں بجلی کی فراہمی بند ہوگئی۔
ٹرپنگ کی وجہ سے کورنگی، لیاری، کھارادر، ڈیفنس، آئی آئی چندریگر روڈ، پی ای سی ایچ ایس، صدر، سائٹ ایریا، نارتھ کراچی اور نارتھ ناظم آباد میں بجلی کی سپلائی معطل ہوگئی۔
اس حوالے سے ترجمان کے الیکٹرک کا کہنا ہے کہ چند علاقوں سے بجلی تعطل کی شکایات موصول ہوئی ہیں،ان کا مزید کہنا تھا کہ محدود تکنیکی خرابی کے باعث آنے والے تعطل کو فوری دور کردیا گیا ہے۔
ترجمان نے مزید بتایا کہ کراچی میں بجلی کی سپلائی نارمل ہے، تاہم لسبیلہ اور بلدیہ میں سپلائی مکمل بحال ہونے میں وقت درکار ہے۔