لاہور : ٹریفک کی روانی کو بہتر بنانے کے لیےایک اور انقلابی قدم، بائیکرز کیلئے الگ راستہ مختص

لاہور:صوبائی دارالحکومت لاہور میں ٹریفک کی روانی کو بہتر بنانے اور حادثات سے بچاؤ کے لیےوزیراعلیٰ پنجاب مریم نواز کی ہدایت پر لاہور میں جدید معیار کی ٹریفک کے لیے ایک اور انقلابی قدم کے تحت سڑکوں پر سائیکل اور موٹر سائیکل سواروں کیلئے الگ راستہ مختص کر دیا گیا۔
شہر لاہور کی سڑکوں پر سائیکل اور موٹر سائیکل سواروں کے لیے الگ راستہ مختص کر دیا گیا ہے، اس اقدام سے سائیکل اور موٹر سائیکل سواروں کی حادثات سے حفاظت ہو گی۔
پہلے مرحلے میں فیروز پور روڈ کینال روڈ سے لاہور پل تک بائیکر لین کی تعمیر جاری ہے، 10 کلومیٹر بائیکرز لین کو خوبصورت سبز رنگ سے تیار کیا جا رہا ہے۔
 جبکہ اس کے بعد مرحلہ وار لاہور کی تمام سڑکوں پر بائیکر لینز بنائی جائیں گی۔
اس حوالے سے شہریوں کا کہنا ہے کہ بائیکرز لین کے جدید عالمی تصور سے حادثات میں کمی اور ٹریفک کی روانی میں بہتری آئے گی۔
دوسری جانب وزیر اعلیٰ پنجاب مریم نواز نے بائیکرز لین پر تعمیراتی معیار کو بہترین بنانے کی ہدایت کی ہے۔