ملک شدید خطرات میں ، حکمران کوئی بڑا بلنڈر کر سکتے ہیں : آصف زرداری

سابق صدر آصف علی زرداری نے پیپلز پارٹی پنجاب کے جنرل سیکرٹری چودھری منظور احمد کو ٹیلی فون کیا ۔آصف علی زرداری نے کہا کہ  پاکستان ڈیمو کریٹک موومنٹ  (پی ڈی ایم) متحد ہے، حکومت پر ہر طرف سے وار کرے گی،  ملک شدید خطرات میں ہے،حکمران کوئی بڑا بلنڈر کر سکتے ہیں، حکومت کو گھر بھیجنا اس وقت بہت ضروری ہو چکا ہے ۔

سابق صدر کا کہنا تھا کہ   اناڑی حکمرانوں کی نااہلی سے ملک کسی بڑے حادثے کا شکار ہو سکتا ہے، حکومت سے نجات کیلئے پی ڈی ایم تمام آپشنز بتدریج استعمال کرےگا۔ اگلے چند مہینے ملکی سیاست کے مستقبل کیلئےبہت اہم ہیں۔ حکمرانوں کو  اب مزید کرونا کے پیچھے چھپنے نہیں دیں گے۔ نہ یہ ویکسین خرید سکےنہ ہی بے نظیر انکم سپورٹ پروگرام کے علاوہ یہ کرونا پر عوام کی مدد کر سکے۔

آصف علی زرداری کا چودھری منظور سے گفتگو میں کہنا تھا کہ  ہم نے 2008 کے عالمی معاشی بحران کے باوجود ایکسپورٹ 19 ارب سے 26ارب تک بڑھائی۔ ملک کا ریونیو ڈبل کیا۔ملازمین کی 125فیصد تنخواہیں بڑھائیں۔ سرکاری ملازمین کی پینشن میں 100 فیصد اضافہ کیا اور  اناڑی حکمرانوں نے آج ملک کے تمام اشاریے منفی کر دیے  ہیں۔ میں نے پہلے کہا تھا یہ سلیکٹڈ حکمران اپنے وزن سے خود گریں گے۔ اب یہ گر چکے ہیں۔بس اب ایک آخری دھکے کی ضرورت ہے۔ پی ڈی ایم کے ساتھ ملکر پیپلز پارٹی اس ناکام اور ناہل ٹولے کو گھر بھیجے گی۔