دہشت گردی ملک کی جڑیں کھوکھلی کرتی ہے ، دہشتگردوں کا کوئی مذہب نہیں ہوتا ، طاہر اشرفی

چیئرمین پاکستان علماء کونسل حافظ طاہرمحمود اشرفی نے سانحہ جعفر ایکسپریس کی مذمت کرتے ہوئے کہا کہ دہشت گردوں کاکوئی مذہب نہیں۔

چیئرمین پاکستان علماء کونسل حافظ طاہرمحمود اشرفی نے لاہور میں نیوز کانفرنس کرتے ہوئے کہا کہ دہشت گردی ملک کی جڑیں کھوکھلی کرتی ہے،انہوں نے کہا کہ دہشت گردی کا مقابلہ باہمی اتحاد سے کرنا ہوگا، دشمن پاکستان میں انتشار پیدا کرنے میں کامیاب نہیں ہوگا جب کہ یہ خوارجیوں اور اسلام پسندوں کی لڑائی ہے۔

سانحہ جعفرایکسپریس میں بیرونی طاقتیں ملوث ہیں اور دہشت گردوں کے خلاف بھرپور کارروائی ہونی چاہیے۔

ان کا کہنا تھا کہ ہم افغانستان میں امن چاہتے ہیں، افغانستان امن کیوں نہیں چاہتا؟۔ بھارت پاکستان میں دہشت گردی کو ہوا دے رہا ہے جب کہ جعفرایکسپریس پر حملہ نائن الیون جیسا ہی تھا۔

حافظ طاہر اشرفی نے علماء کی جانب سے سانحہ جعفرایکسپریس کی بھرپور مذمت کرتے ہوئے کہا کہ دہشت گردوں کا کوئی مذہب نہیں، علماء و مشائخ دہشت گردی کے خلاف ملکی اداروں کے شانہ بشانہ ہیں۔