جسٹس علی باقر نجفی نے سپریم کورٹ کے جج کے طور پر اپنے عہدے کا حلف اٹھا لیا

جسٹس علی باقر نجفی نے سپریم کورٹ آف پاکستان کے جج کے طور پر اپنے عہدے کا حلف اٹھا لیا۔ تقریبِ حلف برداری سپریم کورٹ اسلام آباد میں منعقد ہوئی جہاں چیف جسٹس یحییٰ آفریدی نے ان سے حلف لیا۔

تقریب میں سپریم کورٹ کے ججز، سینئر وکلا اور دیگر اعلیٰ عدالتی حکام نے شرکت کی۔ جسٹس علی باقر نجفی اس سے قبل لاہور ہائی کورٹ میں بطور جج فرائض انجام دے رہے تھے۔

ان کی تقرری صدر مملکت کی منظوری کے بعد عمل میں آئی، جس کے بعد وزارت قانون کی جانب سے باضابطہ نوٹیفکیشن جاری کر دیا گیا۔ان کی تعیناتی آئین کے آرٹیکل 177(1) اور 175A(8) کے تحت کی گئی ہے، جو حلف برداری کی تاریخ سے مؤثر ہو گی۔

یاد رہے کہ جسٹس علی باقر نجفی کی تقرری کی سفارش جوڈیشل کمیشن آف پاکستان نے کی تھی۔ ان کی شمولیت کے بعد سپریم کورٹ میں ججوں کی تعداد میں اضافہ ہوا ہے، جو عدالتِ عظمیٰ کی کارکردگی کو مزید مؤثر بنانے میں مددگار ثابت ہو گی۔