نائب وزیراعظم اسحاق ڈار کل کابل کا دورہ کریں گے،ترجمان دفترخارجہ

اسلام آباد:ترجمان دفترخارجہ شفقت علی خان کا کہنا ہے کہ وزیر خارجہ و نائب وزیر اعظم اسحاق ڈار کل کابل کا دورہ کریں گے۔
ترجمان دفترخارجہ شفقت علی خان نے ہفتہ وار پریس بریفنگ دیتے ہوئے کہا کہ نائب وزیراعظم اسحاق ڈار کل کابل کا دورہ کریں گے،دورے کے دوران  ایک اعلیٰ سطح وفد بھی نائب وزیراعظم کے ہمراہ ہوگا، اسحاق ڈار افغان قائم مقام وزیر اعظم ملا محمد حسن اخوند سے ملاقات کریں گے۔
اس کے علاوہ ان کی افغانستان کے قائم مقام نائب وزیر اعظم برائے اقتصادی امور ملا عبدالغنی برادر اور قائم مقام وزیر خارجہ امیر خان متقی سے بھی ملاقاتیں اور وفود کی سطح پر بات چیت ہوگی۔
نائب وزیراعظم کا دورہ افغانستان انتہائی اہم پیش رفت ہے، ہم افغانستان کے ساتھ تعلقات کو ترجیح دیتے ہیں،انہوں نے مزید کہاکہ وزیرخارجہ اسحاق ڈار کے دورے کے دوران افغانستان کے ساتھ دہشت گردی کے خاتمے اور دیگر سیکیورٹی امور پر بات چیت ہوگی۔
ترجمان کی جانب سے مزید کہا گیا کہ نائب وزیر اعظم کا یہ دورہ برادر ملک افغانستان کے ساتھ پائیدار روابط بڑھانے کیلئے پاکستان کے عزم کا عکاس ہے۔