پہلا ٹی ٹوئنٹی،پاکستان کی جنوبی افریقہ کو3 رنز سے شکست

تفصیلات کے مطابق ٹیسٹ میچوں کے بعد پاکستان اور ساؤتھ افریقہ کے مابین تین ٹونٹی میچوں کی سیریز آج سے قذافی اسٹیڈیم لاہور میں شروع ہوگئی ہے، تینوں میچ قذافی اسٹیڈیم لاہور میں کھیلے جائیں گے اور پہلے ٹی ٹوئنٹی میچ میں جنوبی افریقہ نے پاکستان کے خلاف ٹاس جیت کر فیلڈنگ کا فیصلہ کیا توپاکستان کی جانب سے محمد رضوان اور کپتان بابر اعظم نے اننگز کا آغاز کیا ۔بابر اعظم پہلی ہی گیند پر رن آؤٹ ہو گئے جبکہ حیدر علی نے 21،حسین طلعت نے 15،خوشدل شاہ نے 12 ،افتخار احمد اور فہیم اشرف نے 4،4 رنز بنائے تاہم محمد رضوان نے ایک اینڈ سنبھالے رکھا اور ان کا بلا رنز اگلتا رہا ۔محمد رضوان نے ٹی ٹوئنٹی کیرئیر کی پہلی سنچری اسکور کی اور انہوں نے 7چھکوں اور 6چوکوں  کی مدد سے ناقابل شکست 104 رنز بنائے۔اس طرح 20 اوورز کے اختتام پر پاکستان نے 6وکٹوں کے نقصان پر 169 رنز بنائے اور جنوبی افریقہ کو جیت کے لیے 170 رنز کا ہدف دے دیا۔

پروٹیز کی جانب سے پھلکوایو نے 2 جبکہ فورٹن ،سمپالا اور ٹبریز شمسی نے 1،1 وکٹ حاصل کی۔

جنوبی افریقہ کی جانب سے  میلان اور ہنڈریکس نے اننگز کا آغاز کیا تودونوں نے 53 رنز کا شاندار آغاز فراہم کیا۔ میلان 44 رنز بنا کر پویلین لوٹے جبکہ ہنڈریکس نے 54 رنز بنائے،سنیمان 2،ملر6 ،کپتان کلیسن 12،پھیلکوایو14 رنز بناسکے جبکہ پریٹوریس 15 اور فورٹن 17 رنز کے ساتھ ناقابل شکست رہے اور جنوبی افریقہ نے مقررہ 20 اوورز میں 6وکٹوں پر 166 رنز بنائے۔اس طرح پہلے ٹی ٹوئنٹی میچ میں پاکستان نے جنوبی افریقہ کو سنسنی خیز مقابلے کے  بعد 3 رنز سے شکست دے دی۔ قومی ٹیم کو تین میچز کی سیریز میں 1-0 کی برتری حاصل ہو گئی ہے۔

پاکستان کی جانب سے حارث رؤف اور عثمان قادر نے 2،2 جبکہ فہیم اشرف نے 1وکٹ حاصل کی۔

دونوں ٹیموں کے مابین سیریزکا دوسرا ٹی ٹوئنٹی میچ 13فروری کو کھیلا جائے گا ۔قبل ازیں  دو ٹیسٹ میچزکی سیریز میں پاکستان نے جنوبی افریقہ کو2-0 کلین سوئپ کیا تھا۔