سوات میں سی ٹی ڈی اور پولیس کی مشترکہ کارروائی،3 خارجی دہشتگرد ہلاک

سوات: خیبر پختونخوا کے علاقے سوات میں پولیس اور محکمہ انسداد دہشتگردی (سی ٹی ڈی) نے کامیاب کارروائی کرتے ہوئے 3خارجی دہشت گردوں کو ہلاک کر دیا۔

سیکیورٹی ذرائع کے مطابق پولیس اور سی ٹی ڈی نے بریکوٹ کے علاقہ شموزئی میں اہم کارروائی کی جس کے دوران تین اہم دہشت گرد مارے گئے۔

 ہلاک ہونے والوں میں اجمل جس کی سرکی قیمت بیس لاکھ مقرر تھی، بھی شامل تھا اس کے ساتھ رحیم اللہ رحمانی عرف سکنہ افغانستان اور متین اللہ عرف اسحاق عرف جنید سکنہ مارتونگ شانگلہ بھی انجام کو پہنچ گئے۔

ذرائع کامزید کہنا تھا کہ اجمل عرف وقاص ملوک آباد کا رہائشی تھا، وہ دہشت گردی کے 9 مقدمات میں مطلوب تھا اور اس نے 8 افراد کو قتل کیا تھا۔

اسی طرح مطیع اللہ عرف اسحاق کے خلاف ضلع شانگلہ میں دہشت گردی کے 2 مقدمات درج تھے، جبکہ رحیم اللہ رحمانی عرف روح دہشت گردی کے 2 مقدمات میں مطلو ب تھا۔

دوسری جانب پولیس کا کہنا ہے کہ دہشتگردوں کے خلاف کارروائی خفیہ اطلاعات کی بنیاد پر کی گئی اور علاقے میں سیکیورٹی مزید سخت کر دی گئی۔