پاکستان، امریکہ سے امداد نہیں تجارت چاہتا ہے،جلد دونوں ممالک میں معاہد ہ ہو جائے گا ،اسحاق ڈار

واشنگٹن ڈی سی: نائب وزیراعظم و وزیر خارجہ اسحاق ڈار نے کہا ہے کہ پاکستان امریکہ سے امداد نہیں بلکہ تجارت چاہتا ہے،ان کا کہنا تھا کہ امریکی مصنوعات کو پاکستان میں زیادہ رسائی دینے جا رہے ہیں، امید ہے کہ جلد ہی دونوںممالک کے مابین تجارتی معاہدہ ہو جائے گا۔

تفصیلات کے مطابق وزیر خارجہ اسحاق ڈار نے اٹلانٹک کونسل کے زیر اہتمام تقریب سے گفتگو کرتے ہوئے کہا کہ دنیا بہت تیزی سے تبدیل ہو رہی ہے، پاکستان امن پسند ایٹمی ملک ہے،ان کا کہنا تھا کہ امریکی وزیرخارجہ مارکوروبیو سے ملاقات مفید رہی، امریکی ہم منصب سے ملاقات میں باہمی شراکت داری پر زور دیا، پاک-بھارت جنگ بندی میں امریکا کے کردار کو سراہا۔

انہوں نے کہا کہ خطے میں امن بھارت سمیت تمام فریقین کے رویوں پر منحصر ہے تاکہ بین الاقوامی اقدار کے تحت تنازعات پر مذاکرات ہوں۔

 نائب وزیراعظم نے کہا کہ بھارت کا خطے میں بالاتری قائم کرنے کی کوششیں 7 اور 10 مئی کے درمیان دفن کردی گئی ہیں، بالاتری، تسلط اور نیٹ سکیورٹی پرووائیڈر کے دعوے ختم ہوچکے ہیں۔

تقریب سے خطاب میں وزیر خارجہ اسحاق ڈار نےمزید کہا کہ عالمی معیشت دباؤ میں ہے، مہنگائی کی شرح میں کمی ہوئی، حکومت سنبھالنے کے بعد معاشی چیلنجز کا سامنا رہا، پاکستان میں میکرو اکنامک استحکام آچکا۔

تقریب سے خطاب میں ان کا کہنا تھا کہ پاکستان کی سب سے زیادہ برآمدات امریکا جاتی ہیں، امریکی مصنوعات کو پاکستان میں زیادہ رسائی دینے جا رہے ہیں۔

اسحاق ڈار نے مزید کہا کہ پاکستان تنازعات کا پرامن حل چاہتاہے، امریکا سے ہمارا تعلق کثیر الجہتی ہے، پاکستان دہشت گردی کے خلاف نبردآزما ہے،ان کا کہنا تھا کہ مستحکم افغانستان ہی پاکستان کے مفاد میں ہے۔

تقریب سے خطاب میں وزیر خارجہ اسحاق ڈار نے ایک دفعہ پھرفلسطین کے دوریاستی حل پر گفتگوکرتے ہوئے مطالبہ کیا کہ بیت المقدس آزاد فلسطینی ریاست کا دارالحکومت ہوناچاہیے۔