انگلینڈ اور بھارت میچ : پاکستانی ٹیم کی شرٹ پہننے پر کرکٹ مداح کو گراؤنڈ سے نکال دیا گیا

بھارت اور انگلینڈ کے درمیان مانچسٹر میں جاری چوتھے ٹیسٹ میچ کے دوران ایک پاکستانی کرکٹ مداح کو محض قومی ٹیم کی شرٹ پہننے پر اسٹیڈیم سے باہر نکال دیا گیا۔

متاثرہ شائق، فاروق نذر، نے سوشل میڈیا پر ایک ویڈیو شیئر کی جس میں دیکھا جا سکتا ہے کہ اسٹیڈیم کے ایک اہلکار انہیں مخاطب کرتے ہوئے کہتا ہے کہ وہ پاکستانی کرکٹ ٹیم کی شرٹ پہن کر اندر نہیں بیٹھ سکتے اور انہیں اسے ڈھانپنے یا اتارنے کی ہدایت دی جاتی ہے۔

فاروق نذر نے اہلکار سے سوال کیا کہ اگر دیگر شائقین مختلف ٹیموں کی شرٹس پہن کر میچ دیکھ سکتے ہیں تو پاکستانی ٹیم کی شرٹ پر اعتراض کیوں؟ انہوں نے اہلکار سے تحریری طور پر پابندی دینے کا مطالبہ بھی کیا۔

تاہم، بحث و تکرار کے باوجود گراؤنڈ انتظامیہ کا مؤقف یہی رہا کہ پاکستانی شرٹ قابل قبول نہیں، اور بعد ازاں سیکیورٹی اہلکاروں کی موجودگی میں فاروق نذر کو اسٹیڈیم سے باہر نکال دیا گیا۔

واقعے کے بعد سوشل میڈیا پر اس اقدام کو غیرمنصفانہ اور تعصب پر مبنی قرار دیا جا رہا ہے، جبکہ کئی صارفین نے مطالبہ کیا ہے کہ انگلینڈ اینڈ ویلز کرکٹ بورڈ (ECB) اس رویے پر وضاحت دے۔