چینی مہنگی بیچنے والوں کے خلاف سخت کارروائی کی جائے: وزیراعظم کی ہدایت

اسلام آباد: وزیراعظم شہباز شریف نے چینی کی قیمتوں کے حوالے سے اجلاس میں واضح ہدایت دی ہے کہ معاہدے کی خلاف ورزی کر کے زائد قیمتیں وصول کرنے والوں کے خلاف سخت کارروائی کی جائے۔

یہ ہدایات وزیراعظم کی زیر صدارت چینی کی دستیابی اور قیمتوں سے متعلق ہونے والے اجلاس میں دی گئیں، جس میں متعلقہ حکام نے بریفنگ دی۔

حکام نے اجلاس کو بتایا کہ ملک میں چینی کی مصنوعی قلت پیدا کرنے والوں کے خلاف کارروائیاں جاری ہیں۔

وزیراعظم نے ہدایت کی کہ پاکستان شوگر ملز ایسوسی ایشن اور حکومت کے مابین طے شدہ معاہدے پر سختی سے عملدرآمد یقینی بنایا جائے۔

انہوں نے چینی کی ایکس مل قیمت 165 روپے اور ریٹیل قیمت 173 روپے فی کلو پر عملدرآمد کی تاکید کرتے ہوئے کہا کہ کسی کو بھی عوام کا معاشی استحصال کرنے کی اجازت نہیں دی جائے گی۔