پشاور: پی ٹی آئی کارکنوں نے وزیراعلیٰ علی امین گنڈاپور کا قافلہ روک لیا

پاکستان تحریک انصاف (پی ٹی آئی) کے کارکنوں نے وزیراعلیٰ خیبر پختونخوا علی امین گنڈاپور کے قافلے کو رنگ روڈ پر روک لیا۔

وزیراعلیٰ عمران خان کی رہائی کے حق میں نکالی گئی ریلی کی قیادت کے لیے حیات آباد ٹول پلازہ پہنچے تھے، جہاں پی ٹی آئی کارکنوں نے ان کے کنٹینر کے سامنے سڑک پر دھرنا دے دیا۔

جب علی امین گنڈاپور کنٹینر پر چڑھے تو کارکنوں نے "ڈی چوک چلیں" کے نعرے لگانا شروع کر دیے۔

صورتحال پر قابو پانے کے لیے ٹریفک پولیس اہلکاروں اور پارٹی رہنماؤں نے مداخلت کرتے ہوئے کارکنوں کو سڑک سے ہٹایا، جس کے بعد قافلہ اپنی منزل کی جانب روانہ ہو گیا۔