بنگلہ دیش میں عام انتخابات فروری 2026 میں ہوں گے، محمد یونس کا اعلان

بنگلہ دیش کے عبوری وزیرِاعظم اور نوبیل امن انعام یافتہ محمد یونس نے اعلان کیا ہے کہ ملک میں آئندہ عام انتخابات فروری 2026 میں منعقد ہوں گے۔

قوم سے خطاب میں 85 سالہ محمد یونس نے بتایا کہ وہ چیف الیکشن کمشنر کو باضابطہ خط لکھیں گے، جس میں درخواست کی جائے گی کہ انتخابات رمضان سے قبل کرائے جائیں تاکہ سیاسی عمل میں کسی قسم کی تاخیر نہ ہو۔

انہوں نے واضح کیا کہ انتخابات کے فوراً بعد وہ اپنے عہدے سے مستعفی ہو جائیں گے، تاکہ جمہوری طور پر منتخب حکومت کو اقتدار پُرامن طریقے سے منتقل کیا جا سکے۔

محمد یونس کا کہنا تھا کہ بنگلہ دیش اب جمہوریت کی بحالی کے آخری اور اہم ترین مرحلے میں داخل ہو رہا ہے۔