یوٹیلٹی اسٹورز کی بندش پارلیمانی وعدہ خلافی ہے، پیپلزپارٹی کو فیصلہ قبول نہیں: خورشید شاہ

پاکستان پیپلز پارٹی کے سینئر رہنما سید خورشید شاہ نے کہا ہے کہ یوٹیلٹی اسٹورز کارپوریشن کی بندش پارلیمانی وعدہ خلافی کے مترادف ہے، اور یہ اقدام غریب عوام کے ساتھ زیادتی ہے۔

ڈان نیوز کے مطابق، آل پاکستان ورکرز الائنس کے سیکریٹری جنرل سید عارف حسین شاہ نے وفد کے ہمراہ خورشید شاہ سے ملاقات کی اور یوٹیلٹی اسٹورز کی بندش سے متعلق تفصیلی بریفنگ دی۔

ملاقات کے بعد اپنے بیان میں خورشید شاہ نے کہا کہ پیپلز پارٹی کو یہ فیصلہ کسی صورت قبول نہیں، اور پارٹی یوٹیلٹی اسٹورز کے ملازمین کے ساتھ کھڑی ہے۔

ان کا کہنا تھا کہ اس معاملے پر پارٹی چیئرمین بلاول بھٹو زرداری نے وزیر اعظم کو تحفظات سے آگاہ کر دیا ہے، اور وزیر خزانہ کی واپسی پر یوٹیلٹی اسٹورز کے مستقبل سے متعلق حکومتی کمیٹی سے بات چیت کی جائے گی۔