سیکیورٹی فورسز کا شمالی وزیرستان میں خفیہ آپریشن ، 5 دہشت گرد ہلاک

پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسزنےشمالی وزیرستان کےعلاقےمیرعلی میں آپریشن کیا ،خفیہ آپریشن کےدوران 5دہشت گردمارےگئے،ہلاک دہشتگردوں میں کمانڈرسیدرحیم اورسیف اللہ نورشامل ہیں۔

آئی ایس پی آر کے مطابق  سیدرحیم 2007سےاب تک 17دہشتگردحملوں میں ملوث رہا ہے،جبکہ کمانڈرسیدرحیم وانا،میرعلی میں خودکش سینٹرزکاانچارج تھا۔

ترجمان پاک فوج کا کہنا ہے کہ  ملک دشمن ایجنسیوں نےکمانڈررحیم کوٹارگٹ کلنگ،دہشتگردبھرتی کرنےکاٹاسک دیاتھا، کمانڈرسیدرحیم میرعلی کے4ملک،3انجینئرزکےقتل میں ملوث تھا۔سیف اللہ سیکیورٹی فورسزپربارودی سرنگوں کےحملوں میں ملوث تھا۔

خیال رہے کہ 18 جنوری کو  سیکیورٹی فورسز نے شمالی وزیرستان کے علاقے نرگوسا میں خفیہ اطلاع پر آپریشن کیا تھا، جس میں 2 دہشت گرد ہلاک ہوگئے تھے۔ہلاک ہونے والے دہشت گردوں میں عثمان علی اور وحید لشتئی شامل ہیں جو دہشت گرد تحریک طالبان سجنا گروپ کے سرگرم رکن تھے۔دہشت گرد سیکیورٹی فورسز پر حملوں میں ملوث تھے جبکہ مارے جانے والے دہشت گرد باردوی سرنگیں بنانے اور تربیت کے ماہر تھے۔دہشت گرد عثمان 14 اکتوبر 2020 کو سیکیورٹی فورسز پر ہونے والے حملے میں ملوث تھا جس میں کیپٹن عمر چیمہ اور 3 سپاہی شہید ہوئے تھے جبکہ 4 زخمی ہوئے تھے۔

واضح رہے کہ 14 جنوری کو شمالی وزیرستان میں خفیہ اطلاعات پر کیے گئے آپریشن میں بھی 2 دہشت گرد مارے گئے تھے اور 3 سپاہیوں نے جام شہادت نوش کیا تھا۔

گزشتہ سال نومبر میں شمالی وزیرستان کے علاقے سپن وام میں خفیہ آپریشن کے دوران دہشت گردوں نے سیکیورٹی فورسز پر فائرنگ کی تھی جوابی فائرنگ میں 4 دہشت گرد مارے گئے تھے۔آئی ایس پی آر کا کہنا تھا کہ فائرنگ کے دوران27سالہ سپاہی صدام شہید اور 2جوان زخمی بھی ہوئے تھے۔