اسحاق ڈار کی امیر جماعت اسلامی بنگلا دیش سے ملاقات، پاکستان سے تعلقات کے فروغ پر تبادلہ خیال

ڈھاکا: وزیر خارجہ اسحاق ڈار 2 روزہ سرکاری دورے پر ہیں جہاں انہوں نے بنگلہ دیشی اعلی قیادت اور امیر جماعت اسلامی سے ملاقاتیں کیں،جن میں دو طرفہ تعلقات اور تعاون کے فروغ پر تبادلہ خیال کیا گیا۔

ترجمان دفتر خارجہ کے مطابق ڈھاکا میں امیر جماعتِ اسلامی ڈاکٹر شفیق الرحمان کی رہائش گاہ پر اسحاق ڈار نے ان سے ملاقات کی۔

ترجمان نے بتایا کہ ڈاکٹر شفیق الرحمان دل کے آپریشن کے بعد صحت یاب ہو رہے ہیں اور وزیر خارجہ نے ان کی عیادت کی۔

ترجمان کے مطابق دوران ملاقات اسحاق ڈار نے وزیراعظم پاکستان میاں شہباز شریف اوراپنی جانب سے ڈاکٹرشفیق الرحمن کی صحت وسلامتی کے لیے نیک خواہشات کا اظہار کیا۔

پاکستانی ہائی کمیشن میں ہونے والی ملاقات میں پاک بنگلا دیش تعلقات مضبوط بنانے پر تبادلہ خیال کیا گیا اور خطے میں حالیہ پیش رفت پر بھی گفتگو کی گئی۔

جماعت اسلامی بنگلا دیش کے ترجمان نے بتایا کہ وزیر خارجہ اسحاق ڈار نے ڈاکٹرشفیق الرحمن کی سیاست، تعلیم اور سماجی بہبود کےشعبوں کے لیے مثبت خدمات کو سراہا۔

دوران ملاقات امیرجماعت اسلامی بنگلادیش نے پاکستان سے تعلقات کے فروغ اور مزید قربت پر زور دیا جبکہ وزیر خارجہ نے بھی ایسے ہی خیالات کا اظہار کیا۔ترجمان دفترخارجہ نے کہا کہ اسحاق ڈار نے جماعت اسلامی بنگلادیش کی کٹھن حالات کے باوجود ثابت قدمی کو سراہا۔

دفتر خارجہ کے مطابق جماعتِ اسلامی کے نائب امیر ڈاکٹر سید عبداللہ محمد طاہر اور دیگر رہنما بھی ملاقات میں موجود تھے،خیال رہے کہ وزیر خارجہ نے گزشتہ روز بھی جماعت اسلامی بنگلا دیش کے وفد سے ملاقات کی تھی۔