بانی پی ٹی آئی کی صحت ٹھیک ہے،بیرسٹر سلمان صفدرکی عمران خان سے ملاقات کے بعد گفتگو

راولپنڈی : سپریم کورٹ کی جانب سے خصوصی طور پر اجازت ملنے کے بعد بیرسٹر سلمان صفدر نے اڈیالہ جیل میںقید بانی پی ٹی آئی عمران خان سے ملاقات کی جو کہ 3 گھنٹے تک جاری رہی۔

بانی پی ٹی آئی سے ملاقات کے بعد باہر آکر میڈیا سے گفتگو  میں بیرسٹر سلمان صفدرکا کہنا تھا کہ بانی پی ٹی آئی عمران خان کی صحت ٹھیک ہے، بانی پی ٹی آئی تک  پوری رسائی دی گئی ہے۔

میڈیا سے گفتگو میں بیرسٹرسلمان صفدر کا کہنا تھا کہ رپورٹ سپریم کورٹ میں داخل کرانے تک کچھ نہیں کہوں گا، دیکھ لیں میں 3گھنٹے بعد باہر آیا ہوں۔

خیال رہے کہ اس سے قبل عمران خان کے خلاف دائر توشہ خانہ فوجداری کیس کی سماعت چیف جسٹس پاکستان یحییٰ آفریدی اور جسٹس شاہد بلال حسن پر مشتمل دو رکنی بینچ نے کی، جہاں  سپریم کورٹ نے توشہ خانہ فوجداری کیس میں ایڈووکیٹ سلمان صفدر کو فرینڈ آف دی کورٹ مقرر کرتے ہوئے اڈیالہ جیل میں عمران خان کی بیرک تک رسائی کی اجازت دی۔

دوران سماعت عدالت نے کہا کہ 24 اگست 2023 کے حکمنامے کے تحت جو رپورٹ تھی اس وقت بانی پی ٹی آئی اٹک جیل میں تھے، یہ مناسب ہےکہ بانی پی ٹی آئی کی لِونگ کنڈیشن پر رپورٹ منگوائی جائے، سلمان صفدر بطور فرینڈ آف دی کورٹ اڈیالہ جیل جائیں، سلمان صفدر کو بانی پی ٹی آئی کی بیرک تک رسائی دی جائے تاکہ وہ تحریری جواب دیں، سلمان صفدر کل تک تحریری رپورٹ جمع کرائیں۔

سپریم کورٹ نے ایڈووکیٹ سلمان صفدر کو ہدایت کی کہ وہ بانی پی ٹی آئی عمران خان کی جیل میں حالت زار اور انہیں دستیاب سہولیات  سے متعلق تحریری رپورٹ دیں۔

بعد ازاں سپریم کورٹ نے توشہ خانہ فوجداری کیس کی سماعت 12 فروری تک کے لیے ملتوی کر دی۔