پشاور:صوبائی حکومت نے بی آر ٹی کرایوں میں اضافے کی تجویز مسترد کردی

پشاور: خیبر پختونخوا کی صوبائی حکومت نے پشاور میں چلنے والی بی آر ٹی بس کے کرایوں میں اضافے کی تجویز مستر دکر دی۔

تفصیلات کے مطابق ٹرانس پشاور کی جانب سے پیٹرولیم مصنوعات کی قیمتوں میں اضافے کے تناظر میں بی آر ٹی کے کرایوں میں اضافے کی سمری وزیراعلی کو بھجوائی جبکہ وزیراعلی نے مسترد کر دیا۔

اس موقع پر صوبائی مشیر خزانہ مزمل اسلم نے کہا کہ حکومت عوام پر بوجھ نہیں ڈالنا چاہتی اس لیے وزیراعلی سہیل آفریدی نے بی آر ٹی بسوں میں کرائے کی تجویز مسترد کردی ہے۔

ان کامزید کہنا تھا کہ حکومت کی کوشش ہے کہ عوام کو زیادہ سے زیادہ ریلیف فراہم کیا جائے اور مہنگائی کے دباؤ کے باوجود شہریوں کو سفری سہولتیں مناسب قیمت پر میسر رہیں۔

واضح رہے کہ پیٹرولیم مصنوعات کی قیمتوں میں حالیہ اضافے کے بعد ٹرانسپورٹ کے کرایوں میں اضافے سے متعلق خدشات سامنے آرہے تھے، تاہم حکومت کے اس فیصلے سے روزانہ بی آر ٹی استعمال کرنے والے ہزاروں شہریوں کو ریلیف ملے گا۔