قطرمیں بڑا فضائی حادثہ: ہیلی کاپٹر تکنیکی خرابی کے باعث گر کر تباہ ، 7مسافر جاں بحق

دوحہ:قطری فوجی ہیلی کاپٹر تکنیکی خرابی کے باعث گر کر تباہ ہوگیا ،جس کے نتیجے میں سات افراد جاں بحق ہو گئے۔

غیر ملکی میڈیا رپورٹ کے مطابق ہیلی کاپٹر تکنیکی خرابی کے باعث گر ا جس میں قطری مسلح افواج کے 4 ارکان اور 3 ترک شہری جان کی بازی ہار گئے ہیں۔

حکام کے مطابق قطری فوجی ہیلی کاپٹر خلیجی ریاست کے علاقائی پانیوں میں حادثے کا شکار ہوا، قطری اور ترک وزارت دفاع نے حادثے کی تصدیق کی۔

وزارت کے مطابق یہ حادثہ اتوار کے روز معمول کی ڈیوٹی کے دوران پیش آیا، جب ہیلی کاپٹر ملک کی سمندری حدود میں پرواز کر رہا تھا، حادثے کے بعد عملے کے ارکان کی تلاش کیلئے فوری طور پر ریسکیو آپریشن شروع کر دیا گیا ہے۔

حکام کا کہنا ہے کہ ابتدائی اطلاعات کے مطابق حادثہ تکنیکی خرابی کا نتیجہ ہے اور فی الحال کسی دشمنانہ کارروائی کے شواہد سامنے نہیں آئے۔

خیال رہے کہ یہ واقعہ ایسے وقت میں پیش آیا ہے جب خطے میں کشیدگی بڑھ رہی ہے اور حالیہ ہفتوں کے دوران قطر کو سیکیورٹی چیلنجز کا سامنا رہا ہے، حکام نے یقین دہانی کرائی ہے کہ واقعے کی مکمل تحقیقات کی جائیں گی اور ریسکیو آپریشن جاری رکھا جائے گا۔