کفایت شعاری مہم کے تحت وزیراعظم کا بڑا فیصلہ، سرکاری گاڑیوں میں ہائی اوکٹین فیول کے استعمال پر پابندی 

اسلام آباد: ہائی اوکٹین فیول پر پیٹرولیم لیوی میں اضافے کے فیصلے کے تسلسل میں وزیر اعظم کا ایک اور اہم فیصلہ،سرکاری گاڑیوں میں ہائی اوکٹین ایندھن کے استعمال پر پابندی عائد کر دی گئی ہے اس پابندی کا اطلاق فی الفور ہو گا۔

تفصیلات کے مطابق وزیراعظم شہبازشریف نے کہاہے کہ اگر کسی بھی سرکاری محکمے کی گاڑی میں ہائی اوکٹین ایندھن کا استعمال نا گزیر ہے تو استعمال کرنے والا اپنے ذاتی جیب سے استعمال کرسکتا ہے۔

انہوں نے کہا کہ سرکاری خرچ پر ہائی اوکٹین کے استعمال پر سخت پابندی عائد کر دی گئی ہے۔ اس فیصلے کا مقصد قومی وسائل کے موٴثر اور ذمہ دارانہ استعمال کو یقینی بنانا ہےانہوںنے ہدایت کی کہ تمام وفاقی محکمے، اتھارٹیز اور ذیلی ادارے اس فیصلے پر فوری اور مکمل عملدرآمد کو یقینی بنائیں۔

خیال رہے کہ اس سے پہلے سرکاری گاڑیوں کے ایندھن پر ف50فیصد کٹوتی کا اطلاق پہلے ہی چکا، اس کے ساتھ ساتھ 60 فیصدسرکاری گاڑیوں کو گراونڈ کیا جا چکا ہے،جبکہ عوام کو ریلیف دینے کے لیے اور سستا تیل فراہم کرنے کے لیے ان اقدامات کے ذریعے کی گئی بچت کو استعمال کیا گیا ہے۔

انہوں نے کہا کہ کفایت شعاری کی پالیسی پر سختی سے عمل کرتے ہوئے غیر ضروری اخراجات میں کمی لانا وقت کی اہم ضرورت ہے۔ اس اقدام سے حکومتی اخراجات میں کمی آئے گی اور عوامی وسائل کا بہتر استعمال ممکن ہوگا۔

وزیر اعظم نے متعلقہ حکام کو ہدایت کی کہ اس فیصلے کی نگرانی کے لیے موٴثر نظام وضع کیا جائے اور خلاف ورزی کی صورت میں سخت کارروائی عمل میں لائی جائے۔