کولمبیا میں فوجی مسافر طیارہ گرکر تباہ،34 افراد ہلاک ،درجنوں زخمی،ریسکیو آپریشن جاری

بگوٹا: لاطینی امریکہ کے ملک کولمبیا میں ایک فوجی مسافر طیارہ حادثے کا شکار ہو گیا ہے جس کے نتیجے میں 34 افراد ہلاک جبکہ 14 ابھی تک لاپتہ ہیں۔

غیر ملکی میڈی کے مطابق حادثے کے بعد ریسکیو آپریشن جاری ہے جس میں اب تک 77 افراد کو زندہ بچا لیا گیا ہے، زخمیوں کو ہسپتال منتقل کر دیا گیا۔

رپورٹس میں مزید بتایا گیا ہے کہ طیارے نے پروکی سرحد کے قریب پورٹو لیگویزامو سے اڑان بھری تھی اور خیال ظاہر کیا جارہا ہے کہ طیارہ اُڑان بھرتے وقت رن وے کے اختتام کے قریب کسی چیز سے ٹکرا گیا تھا۔

رپورٹس کے مطابق اس حوالے سے کولمبیا کے وزیر دفاع کا کہنا ہے کہ سی ون تھرٹی طیارہ افسوسناک حادثے کا شکار ہوا، حادثہ پوتو مائیو ریجن میں پیش آیا جہاں کے گورنر نے ہلاکتوں کی تصدیق کی ہے۔

میڈیا رپورٹس میں مزید بتایا گیا ہے کہ مسافر طیارہ ٹیک آف کے فوراً بعد گر کر تباہ ہوا اور اس میں 125 افراد سوار تھے۔

قبل ازیں کولمبیا کے صدر پیٹرو نے سوشل میڈیا پر جاری بیان میں کہا ہے کہ طیارے میں سوار 40 سے زائد افراد کی حالت تاحال واضح نہیں ہو سکی۔

دوسری جانب کولمبین فضائیہ کے کمانڈر کا کہنا ہے کہ طیارے میں 114 مسافر اور 11 عملے کے ارکان سوار تھے، حادثے کی وجوہات جاننے کیلئے تحقیقات جاری ہیں۔