ایرانی وزیر خارجہ کا اسحاق ڈار اور فیلڈ مارشل سے رابطہ،عراقچی کی وفد کے ہمراہ اسلام آباد آمد متوقع

تہران:ایران کے وزیر خارجہ عباس عراقچی نے پاکستان کی سیاسی اور عسکری قیادت سے ٹیلیفونک رابطہ کرکے خطے کی صورتحال اور جنگ بندی کے امور پر تبادلہ خیال کیا۔

ایرانی خبر ایجنسی کے مطابق عباس عراقچی نے فیلڈ مارشل عاصم منیر اور نائب وزیراعظم اسحاق ڈار سے الگ الگ ٹیلیفونک گفتگو کی۔

ایرانی میڈیا نے رپورٹ کیا ہے کہ ٹیلیفونک رابطے میں وزیر خارجہ عباس عراقچی نے گفتگو میں خطے کی صورتحال اور جنگ بندی سے متعلق امور پر تبادلہ خیال کیا۔ترجمان دفتر خارجہ کی جانب سے جاری بیان میں کہا گیا ہے کہ اسحاق ڈار سے گفتگو میں ایرانی وزیرخارجہ نے پاکستان کے مثبت اور تعمیری کردار کی بھرپور تعریف کی، علاقائی امن واستحکام کیلئے دونوں رہنماؤں نے قریبی رابطے میں رہنے پر اتفاق کیا۔

ترجمان دفتر خارجہ کے مطابق اسحاق ڈار نے تنازعات کے حل کیلئے مسلسل مکالمے اور روابط کی اہمیت پر زور دیا ۔ تاکہ خطے میں پائیدار امن اور استحکام قائم ہو سکے۔

حکومتی ذرائع کے مطابق وزیر خارجہ عباس عراقچی کی آج اسلام آباد آمد کا عندیہ دیا ہے۔ عباس عراقچی مختصر ٹیم کےساتھ آج رات اسلام آباد پہنچیں گے اور پاکستانی حکام سے اہم ملاقاتیں کریں گے۔جبکہ امریکی لاجسٹک اور سیکیورٹی ٹیم بھی اسلام آباد میں ہی موجود ہے، جس کے بعد امریکا-ایران مذاکرات کے دوسرے دور کے جلد شروع ہونے کا امکان ہے۔

خیال رہے کہ امریکا اور ایران کے درمیان دو ہفتے کی جنگ بندی کے بعد مذاکرات کا پہلا دور اسلام آباد میں ہوا تھا، جو بے نتیجہ رہا تھا،تاہم اب پاکستان کی ثالثی میں اسلام آباد میں ہی فریقین کو ایک بار پھر مذاکرات کی میز پر لانے کے لیے کوششیں جاری ہیں، جس میں شرکت کے لیے ایران کی جانب سے امریکی بحری ناکہ کے خاتمے کا مطالبہ کیا جارہا ہے۔

دوسری جانب حکومتی حلقوں کا کہنا ہے کہ یہ پیش رفت خطے میں سفارتی سرگرمیوں کو تیز کرنے اور تنازعات کے پرامن حل کی کوششوں کا حصہ ہے۔