حیدر آباد نے راولپنڈیز کو 108 رنز سے ہرا کر پلے آف کیلئے کوالیفائی کرلیا، لاہور قلندر باہر

کراچی: پاکستان سپر لیگ ( پی ایس ایل ) کے اہم میچ میں حیدرآباد کنگز مین نے رالپنڈیز کو 108 رنز کے بڑے مارجن سے شکست دیکر پلے آف مرحلے کیلئے کوالیفائی کرلیا،جبکہ لاہور قلندرز ٹورنامنٹ کے اگلے مرحلے کی دوڑ سے باہر ہو گئی ہے۔

تفصیلات کے مطابق کراچی کے نیشنل بینک اسٹیڈیم میں کھیلے گئے میچ میں راولپنڈیز نے ٹاس جیت کر پہلے فیلڈنگ کا فیصلہ کیا جو کہ درست ثابت نہ ہوا۔

پہلے بلے بازی کرتے ہوئے حیدر آباد کنگز مین نےمقررہ 20 اوورز  میں 6 وکٹ  پر 244  رنز  بنائے،حیدرآباد کی جانب سے گلین میکسویل نے جارحانہ بیٹنگ کرتے ہوئے 37 گیندوں پر 70 رنز بنائے،جبکہ عثمان خان 54 اور کوشال پریرا 50 رنز بنا کر نمایاں رہے۔

دوسری جانب245 رنز کے ہدف کے تعاقب میں راولپنڈیز 17.1 اوورز میں 136 رنز بنا کر آؤٹ ہوگئی۔

 راولپنڈیز کی جانب سے عثمان خواجہ نے بھرپور مزاحمت کی، وہ 66 رنز بنا کر ناٹ آؤٹ  رہے لیکن ان کا ساتھ کوئی نہ دے سکا اور  راولپنڈیز کی وکٹیں پتوں کی طرح بکھرگئیں۔

حیدر آباد کنگز مین کی جانب سے حنین شاہ نے 4 اور عاکف جاوید نے 3 وکٹیں حاصل کیں۔

خیال رہےکہ 245 رنز کے ہدف کے جواب میں راولپنڈیز 136 رنز بنا کر آؤٹ ہوئی، حیدرآباد کنگزمین کو پلے آف تک رسائی کے لیے راولپنڈیز کو 158 رنز تک روکنا تھا،حیدر آباد کنگز مین کے پلے آف میں پہنچنے کے باعث دفاعی چیمپئن لاہور قلندرز ایونٹ سے باہر ہوگئی۔