وزیراعظم یوتھ پروگرام اور پاکستان اولمپک ایسوسی ایشن کے درمیان لیٹر آف انٹینٹ پر دستخط

اسلام آباد: وزیراعظم یوتھ پروگرام اور پاکستان اولمپک ایسوسی ایشن کے درمیان نوجوانوں کو کھیلوں کے ذریعے بااختیار بنانے کے لیے ایک اہم لیٹر آف انٹینٹ پر دستخط کر دیے گئے ۔

تفصیلات کے مطابق معاہدے کے تحت گراس روٹ سے لے کر ایلیٹ سطح تک نوجوانوں کے لیے کھیلوں کے مواقع بڑھانے، اور اولمپک اقدار کے فروغ کے لیے مشترکہ اقدامات پر اتفاق کیا گیا ہے۔

اس شراکت داری میں اولمپک ایجوکیشن، سیف اسپورٹس اور اخلاقی تربیت کے خصوصی پروگرامز بھی شامل ہوں گے۔اس موقع پر رانا مشہود احمد خان نے کہا کہ کھیل نوجوانوں کی جسمانی نشوونما کے ساتھ ساتھ قوم سازی اور قیادت سازی میں اہم کردار ادا کرتے ہیں۔ انہوں نے ارشد ندیم کو نوجوانوں کے لیے کامیابی کی مثال قرار دیا۔

اس موقع پر عارف سعید نے کہا کہ اولمپک موومنٹ کو مزید مضبوط بنایا جائے گا اور خواتین کی کھیلوں میں شمولیت سمیت سیف اسپورٹس کے فروغ پر بھی کام جاری رہے گا۔ یہ معاہدہ چار سال کے لیے مؤثر ہوگا۔