اسرائیلی وزیراعظم نیتن یاہو کا فوج کو غزہ کے 70 فیصد علاقے پر قبضہ کرنے کا حکم

تل ابیب:اسرائیلی وزیراعظم نیتن یاہو نے فوج کو غزہ کے 70 فیصد علاقے پر قبضہ کرنے کا حکم دے دیا۔

صیہونی میڈیا رپورٹس کے مطابق نیتن یاہو نے مقبوضہ مغربی کنارے میں قائم ایک غیر قانونی اسرائیلی بستی میں نیوز کانفرنس کرتے ہوئے اسرائیلی فوج کو غزہ کے مزید حصوں پر قبضہ کرنے کی ہدایت دی ہے۔

رپورٹس کے مطابق اسرائیلی وزیراعظم نے کہا کہ پہلے ہم نے غزہ کی 50 فیصد، پھر 60 فیصد زمین قبضے میں لی، اب میرا حکم ہے 70 فیصد غزہ پر قبضہ کیا جائے۔

اسرائیلی وزیراعظم کے اس بیان کے بعد خطے میں کشیدگی مزید بڑھنے کا خدشہ ظاہر کیا جا رہا ہے۔ دوسری جانب غزہ کی بڑی آبادی پہلے ہی ساحلی پٹی کے ایک محدود حصے تک محصور ہو چکی ہے جہاں خوراک، پانی اور طبی سہولیات کی شدید قلت پائی جاتی ہے۔

واضح رہے کہ غزہ کی آبادی پہلے ہی ساحلی پٹی کے ایک نہایت چھوٹے حصے تک محدود کی جا چکی ہے۔

خیال رہے کہ اسرائیل اکتوبر 2023 میں شروع ہونے والی اپنی جنگ کے دوران تباہ حال ہونے والی اس ساحلی پٹی کے اندازاً 64 فیصد حصے پر مؤثر کنٹرول رکھتا ہے۔