چھانگا مانگا میں مبینہ زہریلا کھانا کھانے سے 2 بہنیں جاں بحق، والدین کی حالت تشویشناک

قصور: چھانگا مانگا کے نواحی علاقے ارجن سنگھ میں مبینہ طور پر زہریلا کھانا کھانے سے دو بہنیں جاں بحق ہوگئیں، جبکہ ان کے والدین کی حالت تشویشناک بتائی جا رہی ہے۔

اسپتال ذرائع کے مطابق متاثرہ خاندان نے گھر میں پکا ہوا کھانا کھایا، جس کے کچھ ہی دیر بعد چاروں افراد کی طبیعت اچانک بگڑ گئی۔ حالت غیر ہونے پر ریسکیو ٹیموں نے انہیں فوری طور پر لاہور کے اسپتال منتقل کیا۔

ذرائع کے مطابق لاہور کے اسپتال میں زیرِ علاج 20 سالہ عمارہ اور 13 سالہ تحریم جانبر نہ ہو سکیں اور دم توڑ گئیں، جبکہ والد محمود اور والدہ شاہدہ بی بی کی حالت تاحال تشویشناک ہے اور انہیں طبی امداد فراہم کی جا رہی ہے۔

اسپتال ذرائع کا کہنا ہے کہ جاں بحق ہونے والی دونوں بہنوں کی لاشیں آبائی گاؤں ارجن سنگھ منتقل کر دی گئی ہیں، جبکہ واقعے کی وجوہات جاننے کے لیے مزید تحقیقات جاری ہیں۔