بیوی کو لینے سسرال پہنچا، چند لمحوں بعد 5 لاشیں ملیں

لاہور: شہر کے علاقے چوہنگ میں ایک افسوسناک واقعہ پیش آیا جہاں داماد نے سسرالیوں پر فائرنگ کرکے اپنی بیوی سمیت 4 افراد کو قتل کردیا، بعد ازاں ملزم نے خود کو بھی گولی مار کر خودکشی کرلی۔

پولیس کے مطابق ملزم عمران شوکت نے تقریباً 6 ماہ قبل سمیعہ بی بی سے زبردستی نکاح کیا تھا، تاہم سمیعہ بی بی اس عرصے کے دوران اپنے والدین کے گھر رہ رہی تھی۔

پولیس کا کہنا ہے کہ ملزم آج صبح اپنی بیوی کو ساتھ لے جانے کے لیے سسرال پہنچا، جہاں اس نے فائرنگ کرکے سمیعہ بی بی کو قتل کردیا۔

پولیس کے مطابق مزاحمت کرنے پر ملزم نے سمیعہ بی بی کے والد علی خان، 21 سالہ ذیشان اور ساس شمائلہ کو بھی فائرنگ کرکے قتل کردیا۔

واقعے کے بعد ملزم عمران شوکت نے خود کو بھی گولی مار لی، جس کے نتیجے میں وہ موقع پر ہی ہلاک ہوگیا۔

واقعے کی اطلاع ملنے پر پولیس فوری طور پر موقع پر پہنچ گئی اور لاشوں کو تحویل میں لے کر پوسٹ مارٹم کے لیے جناح اسپتال منتقل کردیا۔

پولیس کے مطابق واقعے کی مزید تحقیقات جاری ہیں، جبکہ فائرنگ کے واقعے سے متعلق شواہد بھی اکٹھے کیے جا رہے ہیں۔