بی ایس ایف کی فائرنگ، دو پاکستانی شہری جاں بحق

قصور: پاک بھارت بین الاقوامی سرحد کے قریب بھارتی بارڈر سیکیورٹی فورس (بی ایس ایف) کی مبینہ فائرنگ سے دو پاکستانی شہری جاں بحق جبکہ ایک زخمی ہوگیا۔

سیکیورٹی ذرائع کے مطابق لدھڑ گاؤں سے تعلق رکھنے والے تین مقامی پاکستانی شہری سرحدی پلر سے چند قدم آگے بڑھے تو بی ایس ایف اہلکاروں نے مبینہ طور پر انہیں بغیر وارننگ فائرنگ کا نشانہ بنایا۔ ذرائع کے مطابق تینوں افراد نہتے تھے۔

فائرنگ کے نتیجے میں عظمت رسول ولد عطااللہ اور محسن جٹ جاں بحق ہوگئے، دونوں کا تعلق لدھڑ کے علاقے جٹاں والی حویلی سے بتایا گیا ہے، جبکہ تیسرے شہری کو زخمی حالت میں طبی امداد کے لیے منتقل کردیا گیا۔

سیکیورٹی ذرائع کا کہنا ہے کہ تینوں افراد نے بارڈر فینس عبور کرنے کی کوشش نہیں کی تھی۔ ذرائع نے بھارتی فورسز کی جانب سے شہریوں پر فائرنگ کے واقعے کو سرحدی معاہدے اور طے شدہ ایس او پیز کی خلاف ورزی قرار دیا ہے۔

دوسری جانب بھارتی میڈیا نے تینوں پاکستانی شہریوں کو درانداز قرار دیا ہے، تاہم پاکستانی سیکیورٹی ذرائع کا کہنا ہے کہ تینوں افراد نہتے تھے اور انہوں نے سرحد عبور کرنے کی کوشش نہیں کی تھی۔