لاہور: مبینہ اجتماعی زیادتی کی شکار لڑکی کا وطن واپسی سے انکار

لاہور: لاہور میں مبینہ اجتماعی زیادتی کا نشانہ بننے والی آذربائیجان کی شہری لڑکی ڈیانا نے واپس اپنے ملک جانے سے انکار کردیا۔

ائیرپورٹ ذرائع کے مطابق ڈیانا آذربائیجان واپسی کے لیے رات گئے ائیرپورٹ پہنچی، جہاں اس نے چیک اِن اور امیگریشن کا عمل مکمل کیا اور بورڈنگ کے بعد جہاز میں بھی سوار ہوگئی۔ تاہم کچھ دیر بعد اس نے واپس جانے سے انکار کرتے ہوئے جہاز سے اترنے کا فیصلہ کیا۔

ذرائع کے مطابق ڈیانا نے اصرار کیا کہ وہ آذربائیجان نہیں جانا چاہتی اور اسے کسی تیسرے ملک بھیجا جائے۔ وہ رات سے ائیرپورٹ پر موجود ہے، جبکہ آذربائیجان کے سفارت خانے کو بھی صورتحال سے آگاہ کردیا گیا ہے۔

دوسری جانب لاہور میں غیر ملکی خاتون سے مبینہ اجتماعی زیادتی کے مقدمے میں مزید تین ملزمان کو گرفتار کرلیا گیا۔

ڈی آئی جی انویسٹی گیشن ذیشان رضا نے لاہور میں پریس کانفرنس کرتے ہوئے بتایا کہ آذربائیجان کی شہری سے مبینہ اجتماعی زیادتی کے الزام میں ایک خاتون سمیت تین ملزمان گرفتار کیے گئے ہیں، جبکہ چوتھے روپوش ملزم کی تلاش جاری ہے۔

انہوں نے کہا کہ چوتھے ملزم کو بھی جلد گرفتار کرلیا جائے گا۔ گرفتار ملزمان نے جرم کا اعتراف کرلیا ہے، جبکہ متاثرہ خاتون اور ملزمان کے سویبز فرانزک سائنس لیبارٹری بھجوا دیے گئے ہیں۔