اسرائیل نے متحدہ عرب امارات میں سفارتخانہ قائم کر دیا

اسرائیلی میڈیا کے مطابق متحدہ عرب امارات سے سفارتی تعلقات کی بحالی کے بعد اسرائیل نے یو اے ای میں باضابطہ طور پر اپنا سفارتخانہ بھی کھول لیا ہے۔اسرائیلی سفارتخانے میں ایتن نا ایح اسرائیل کے ناظم الامور کے فرائض انجام دیں گے۔اسرائیلی وزارت خارجہ کی جانب سے بیان میں کہا گیا کہ سفارت خانہ اسرائیل کے مفادات کو آگے بڑھانے کے لئے کام کرے گا ۔ فی الوقت سفارتخانہ عارضی طور پر قائم کیا گیا ہے جو جلد ہی مستقل بنیادوں پر ایک عمارت میں منتقل کردیا جائے گا۔

 دوسری جانب متحدہ عرب امارات(یو اے ای) نے بھی اسرائیل کے  شہرتل ابیب میں اپنا  سفارتخانہ بننے کی منظوری دیدی ہے، اسرائیل میں اماراتی سفارتخانہ بنانے کا اعلان حکومتی ٹوئٹر اکاونٹ پر کیاگیا ہے۔

خیال رہے کہ گزشتہ سال یو اے ای اور بحرین  نے اسرائیل کو تسلیم کرلیا تھا۔ متحدہ عرب امارات نے 13 اگست اور بحرین نے 11 ستمبر کو اسرائیل سے امن معاہدے کا اعلان کیا تھا اوردونوں ممالک نے معاہدے پر دستخط 15 ستمبر کو وائٹ ہاؤس میں کیے تھے۔

24 اکتوبر کو سابق صدر ٹرمپ کی سوڈانی قیادت اور اسرائیلی وزیراعظم سے فون پر گفتگو ہوئی تھی جس کے بعد امریکی صدر نے سوڈان کی طرف سے اسرائیل کو تسلیم کرنے کے فیصلے کا اعلان کیا گیا تھا۔جبکہ 10 دسمبر 2020 کو اس وقت کی صدر ٹرمپ نے اعلان کیا تھا کہ  شمالی افریقا کے ایک اور عرب مسلمان ملک مراکش نے اسرائیل کو تسلیم کرلیا ہے۔ اس سے قبل 1979 میں مصر اور اردن 1994 میں اسرائیل کو تسلیم کرچکے ہیں۔