برف پر کبڈی ، وادی سوات میں مقبول ہوتاکھیل

سوات ( رپورٹ :شہزادنوید)

وادی سوات میں اس وقت بالائی علاقے مکمل طورپر پر برف کی سفید چادر سےڈھک  چکے ہیں۔ وادی کالام میں مسلسل برف کے بعد زمین پر دو فٹ سے زائد برف جم چکی ہے۔ بالائی علاقوں میں عموماً ان دنوں میں مقامی لوگ اپنے گھروں میں محصور ہو تے ہیں اور اس بوریت سے  نجات حاصل کرنے کیلئے وادی کالام کے نوجوانوں نے غیر روایتی راستہ اپنا تے ہوئے برف سے ڈھکے میدان کو گراؤنڈ میں تبدیل کرنے کا فیصلہ کیا۔ اور اس طرح وادی سوات میں ایک نئے کھیل کا آغاز ہوا جسے "اسنو کبڈی" کا نام دیا گیا۔

ہر سال جنوری میں کالام کے میدانی جنگل کے بیچ میں "اسنو کبڈی"  کا میدان سجایا جاتا ہے جس میں مجموعی طور پر چھ سے آٹھ ٹیمیں حصہ لیتی ہیں۔ اس سال بھی کالام کے مقامی نوجوانوں نے "اسنو کبڈی" چیمپئن شپ کا انعقاد کیا ہے۔گزشتہ دو سالوں کی نسبت اس سال کھلاڑیوں اور منتظمین میں کافی جوش و خروش پایا جا رہا ہے۔ اسنو کبڈی کے مقابلوں میں کُل چھ ٹیمیں شریک ہوئیں جن کا تعلق وادی کالام اور ملحقہ علاقوں سے ہے۔

کالام میں جہاں درجہ حرارت نقطہ انجماد سے نیچےگر گیا ہے اور سردی کی شدت خون جما رہی ہے،  وہی کالام کے شاہی گراؤنڈ میں کبڈی کے مقابلے کھلاڑیوں کے جسم میں حرارت پیدا کررہے ہیں۔ کبڈی کے مقابلوں میں کھلاڑی اپنے داؤپیچ سے حریف کھلاڑیوں کو نشانہ بنا رہے ہیں اور اپنی ٹیم کی جیت میں اپنا  کردار ادا کر رہے ہیں۔

ایک مقامی کھلاڑی الیاس جان نے بتایا کہ  "گرمیوں میں تو کھیلتے ہی رہتے ہیں مگر شدید برفباری کے دوران منفی درجہ حرارت میں کبڈی کھیلنے کا تجربہ نہایت شاندار رہا،  کیونکہ  نہ سردی محسوس ہوئی اور نہ ہی برف کے باعث زمین پر گر کر زخمی ہونے کا خدشہ ہے"۔

ٹورنامنٹ کے آرگنائز عبدالعزیز جو  کالام میں  پیشہ کے اعتبار سے ڈاکٹر ہیں،ان کاکہنا تھا  کہ "  باری کے دوران یہاں لوگوں کی نقل و حرکت اور سرگرمیاں محدود ہوجاتی ہیں۔جس کے باعث جسمانی صحت پر منفی اثرات مرتب ہوتے ہیں، اسنو کبڈی کا آئیڈیا اس لیے پیش کیاگیا کہ علاقے کے نوجوان سردی کے باعث گھروں میں بیٹھنے کی بجائے ورزش پر توجہ دیں۔ "انہوں نے مزید بتایا کہ " اسنو کبڈی کا مقصد سرمائی سیاحت کو فروغ دینا ہے، اس کبڈی کے تمام  انتظامات اور اخراجات ہم خود اپنی جیب سے کرتے ہیں اور اگر حکومت سرپرستی کرے تو یہ کھیل بطور قومی کھیل  ملکی سیاحت میں اہم کردار ادا کر سکتا ہے۔"