ایف کلاس نیشنل لانگ رینج شوٹنگ چیمپئن شپ 2026 مظفرگڑھ فیلڈ فائرنگ رینجز میں اختتام پذیر

مظفرگڑھ: چوتھی ایف کلاس نیشنل لانگ رینج شوٹنگ چیمپئن شپ 2026ء مظفرگڑھ فیلڈ فائرنگ رینجز میں اختتام پذیر ہوگئی۔ 8 سے 10 اکتوبر تک جاری رہنے والے مقابلوں میں پاکستان بھر سے 70 سے زائد نشانہ بازوں نے شرکت کی۔

چیمپئن شپ میں کرنل ڈاکٹر جنید آفتاب نے 145 اسکور اور 9 وی ایس کے ساتھ نیا قومی ریکارڈ قائم کرتے ہوئے ایف اوپن چیمپئن شپ اپنے نام کرلی۔ انہوں نے 900 اور 1,000 یارڈز کے ایف اوپن رائفل مقابلوں میں گولڈ میڈلز بھی جیتے، جبکہ 900 یارڈز کے مقابلے میں نیا قومی ریکارڈ قائم کیا۔

محمد ولید نے 217 اسکور اور 25 وی ایس کے ساتھ ایف ٹی آر چیمپئن کا اعزاز حاصل کیا۔ احسن ولید گل نے 300 میٹر اسپورٹنگ رائفل، 800 یارڈز ایف ٹی آر ٹیکٹیکل رائفل اور 1,000 یارڈز ایف ٹی آر مقابلوں میں گولڈ میڈلز جیت کر نمایاں کامیابی حاصل کی۔

کمانڈر ملتان کور نے بھی مقابلوں میں حصہ لیا اور 800 یارڈز ایف ٹی آر مقابلے میں گولڈ میڈل، جبکہ ایف اوپن انفرادی مجموعی مقابلے میں سلور میڈل حاصل کیا۔

دیگر مقابلوں میں 300 میٹر ٹارگٹ رائفل کیٹیگری میں احمد جان، جبکہ 900 یارڈز ایف ٹی آر مقابلے میں حوالدار محمد لقمان خان نے گولڈ میڈلز جیتے۔