جنوبی وزیرستان میں دہشت گردوں سے فائرنگ کے تبادلے میں نائب صوبیدار شہید

آئی ایس پی آر کے مطابق جنوبی وزیرستان کے علاقے کنی گرام میں دہشت گردوں کی نقل و حرکت کی اطلاع ملی جس پر پاک فوج اور شدت پسندوں کے درمیان فائرنگ کا تبادلہ ہوا۔

اس دوران فائرنگ کے تبادلے میں ایک دہشت گرد مارا گیا جبکہ 42سالہ نائب صوبیدار سانے زئی شدید زخمی ہو گئے اور بعد میں زخموں کی تاب نہ لاتے ہوئے جام شہادت نوش کیا۔

علاقے سے دہشت گردوں کے خاتمے کے لیے سرچ آپریشن شروع کردیا گیا ہے۔

آئی ایس پی آر کے بیان میں کہا گیا کہ پاک فوج ملک سے دہشت گردی کی لعنت کے خاتمے کے لیے پرعزم ہے اور ہمارے جانباز سپاہیوں کی قربانیاں ہمارے اس عزم کو مزید تقویت بخشتی ہیں۔