سندھ بھر میں آج سے تعلیمی ادارے کھل گئے

تفصیلات کے مطابق سندھ حکومت کی جانب سے جاری  نوٹیفکیشن   کے مطابق صوبے بھر  میں آج سے   تعلیمی سرگرمیاں بحال کردی گئی ہیں اور اسکول 6 دن کھلے رہیں گے۔ اسکول، کالجز اور جامعات میں اسٹاف کی 100 فیصد ویکسینیشن اور طلبہ کی 50 فیصد حاضری کے ساتھ  تعلیمی ادارے کھولے گئے ہیں۔ محکمہ تعلیم سندھ کے مطابق صرف وہ اسکول کھلیں گے جہاں تدریسی و غیر تدریسی اسٹاف ویکسینیشن کراچکا ہوگا۔

والدین کو بھی ویکسینیشن کروا کر کارڈ اسکول میں جمع کروانے کی ہدایت کی گئی ہے۔سندھ حکومت کی جانب سے جاری نو ٹیفکیشن میں کہا گیا ہے کہ محکمہ صحت کی جانب سے ضرورت کے مطابق پی سی آر ٹیسٹ کیے جائیں گے۔ محکمہ صحت سندھ کے مطابق اسکولوں کو انسداد کورونا ایس او پیز ہر عمل لازمی کرنا ہوگا۔

خیال رہے کہ رواں سال کورونا وائرس کی بگڑتی صورتحال کے پیش نظر 16 جولائی کو تعلیمی ادارے بند کردیئے گئے تھے۔