حکومت کا عوام پرایک اوربجلی بم گرانے کا فیصلہ

تفصیلات کے مطابق مہنگائی کے مارے شہریوں کو بجلی کا نیا جھٹکا لگانے کی تیاریاں جاری ہیں ،  سنٹرل پاور پرچیزنگ ایجنسی (سی پی پی اے) نے نیپرا میں  بجلی کی قیمت میں اضافے سے متعلق درخواست جمع کروادی ۔   بجلی کی قیمتوں میں اضافہ ماہانہ فیول ایڈجسٹمنٹ کی مد میں چوتھی بار کیا جائے گا  ۔

سنٹرل پاور پرچیزنگ ایجنسی  کی   درخواست میں کہا گیاہے کہ جنوری میں 7 ارب 72 کروڑیونٹ بجلی پیدا ہوئی، بجلی کی پیداواری لاگت 51 ارب 66 کروڑرہی، بجلی کی پیداوارپرفیول لاگت کا تخمینہ 5 روپے 75 پیسے فی یونٹ لگایا گیا تھا، ‏ جنوری میں فیول لاگت  6 روپے 68 پیسے فی یونٹ رہی، ‏18 روپے 94 پیسے فی یونٹ مہنگی ترین بجلی ڈیزل سے پیدا کی گئی ۔

سنٹرل پاور پرچیزنگ ایجنسی کے مطابق فرنس آئل سے 12 روپے 34 پیسے فی یونٹ بجلی پیدا ہوئی، ایل این جی سے 8 روپے اورقدرتی گیس سے 7 روپے فی یونٹ بجلی پیدا ہوئی، ‏‏27 پیسے فی یونٹ بجلی لائن لاسزکی نذرہوگئی۔   نیپرا بجلی کی قیمتوں میں اضافہ سےمتعلق درخواست پر25 فروری کوسماعت کرےگا۔

واضح رہے کہ 12 فروری کو وفاقی حکومت کی درخواست پرنیشنل الیکٹرک پاور ریگولیٹری اتھارٹی (نیپرا) نے بجلی ایک روپیہ 95 پیسے فی یونٹ مہنگی کرنے کی منظوری دی تھی ۔

11 فروری کو ماہانہ فیول چارجز ایڈجسٹمنٹ برائے دسمبر 2020 کےلیے بجلی کی قیمتوں میں 83 پیسے فی یونٹ اضافہ کیا  تھا ۔

10فروری کو ماہانہ فیول چارچز ایڈجسٹمنٹ کی مد میں حکومت نے بجلی کی فی یونٹ قیمت میں ایک روپے 53پیسے اضافہ کیا تھا۔

خیال رہے کہ  28جنوری کو  نیشنل پاور ریگولیٹری اتھارٹی (نیپرا) نے بجلی کی قیمت میں فی یونٹ 3.5 روپے اضافے کا  عندیہ دیا تھا   ۔ اس سے قبل 11 جنوری کو نیپرا نے صارفین سے 8.40 ارب  روپے اضافی بوجھ ڈالتے ہوئے  بجلی کے نرخوں میں 1 روپے 6 پیسے فی یونٹ کا اضافہ کیا تھا۔