فیصل واوڈا سینیٹ الیکشن کیلئے اہل قرار

تفصیلات کے مطابق الیکشن ٹریبونل  نے     فیصل واوڈا کیخلاف پیپلز پارٹی کے قادرخان مندوخیل کی اپیل خارج کرتے ہوئے  الیکشن کمیشن کا فیصلہ برقراررکھا ہے ۔   الیکشن ٹریبونل میں فیصل واوڈا کے کاغذات نامزدگی منظور کرنے کیخلاف درخواست پر سماعت ہوئی ،وفاقی وزیر کے وکیل نے دلائل دیتے ہوئے کہاکہ فیصل واوڈا نے حقائق نہیں چھپائے،انہوں نے امریکی شہریت چھوڑی دی تھی، کاغذات پر اعتراضات خلاف قانون ہے، قادر خان مندوخیل کی اپیل مسترد کی جائے۔الیکشن ٹریبونل نے فیصلے میں کہاہے کہ فیصل واوڈا کیخلاف اعتراض کرنے والے دہری شہریت پرمطمئن نہ کرسکے،فیصل واوڈا اب سینیٹ انتخابات میں حصہ لے سکتے ہیں۔

خیال رہے کہ پی ٹی آئی کی پارلیمانی بورڈ نے سندھ میں  فیصل واوڈا سے متعلق کارکنان کے اعتراضات مستردکرتے ہوئے  فیصل واوڈا کو دیاگیا ٹکٹ برقراررکھنے کافیصلہ کیا  تھا  ۔ 

اس سے قبل  رکن قومی اسمبلی  فیصل واوڈا کو سینیٹ کا ٹکٹ دینے پر اپوزیشن جماعتوں  کی جانب سے خاصی تنقید کی  گئی ہے ۔ اس کی ایک وجہ ان پر الیکشن کمیشن میں گذشتہ ڈھائی برسوں سے دوہری شہریت سے متعلق نااہلی کا زیر سماعت کیس ہے۔ اس کے ساتھ ساتھ تحریک انصاف سینٹرل سندھ ریجن کے عہدیداروں نے سینیٹ کے ٹکٹ کے معاملے پر شدید تحفظات کا اظہار کیا تھا۔

واضح رہے کہ 48 اراکین سینیٹ کو منتخب کرنے کے لیے پولنگ 3 مارچ کو ہوگی جس میں خیبرپختونخوا اور بلوچستان سے 12، 12 سینیٹرز، پنجاب اور سندھ سے 11،11 جبکہ اسلام آباد سے 2 سینیٹرز کو منتخب کیا جائے گا۔پولنگ میں چاروں صوبوں سے عام نشستوں پر 7 اراکین، 2 نشستوں پر خواتین، 2 نشستوں پر ٹیکنوکریٹس کو منتخب کیا  جائے گا جبکہ خیبرپختونخوا اور بلوچستان سے اقلیتی نشست پر ایک، ایک رکن منتخب ہوگا۔