پی ایس ایل 6 : پشاورزلمی آج ملتان سلطانزسےٹکراؤ کیلئے تیار

تفصیلات کے مطابق   پی ایس ایل سیزن 6 میں  دونوں ٹیمیں پاکستانی وقت کے مطابق شام سات بجے کراچی کے نیشنل اسٹیڈیم میں آمنے سامنے ہوں گی۔ پشاور زلمی کی ٹیم  وہاب ریاض کی قیادت میں جبکہ ملتان سلطانز محمد رضوان کی کپتانی میں میدان میں اتریں گی ۔

خیال رہے کہ دونوں ٹیمیں اپنا پہلا میچ ہارچکی ہیں ، پشاور زلمی کو لاہور قلندرز اور ملتان سلطانز کو اسلام آباد یونائیٹڈ نے شکست سے دوچار کیا تھا ۔

اس وقت پوائنٹس ٹیبل پر لاہور قلندر کی پہلی، کراچی کنگز کی دوسری اور اسلام آباد یونائیٹڈ  کی ٹیم کی تیسری پوزیشن پر ہے۔

گزشتہ روز  پی ایس ایل سیزن 6 کا ایک میچ لاہور قلندرز اور کوئٹہ گلیڈی ایٹرز کے درمیان کھیلا گیا تھا جس میں لاہور قلندرز نے  سنسنی خیز مقابلے میں کوئٹہ گلیڈی ایٹرز کو 9 وکٹوں سے شکست دی۔ لاہور قلندرز نے 179 رنز کا ہدف 19ویں اوور میں پورا کرلیا۔محمد حفیظ 73، فخر زمان 82 رنز بناکر ناٹ آؤٹ رہے،  محمد حفیظ نے 33 گیندوں پر6 چھکوں کی مدد سے  73 رنز بنائے جبکہ  فخر زمان نے 52 گیندوں پر 82 رنز کی اننگز کھیلی۔

یاد رہے کہ پاکستان سپر لیگ کے میچوں میں تماشائیوں کے لیے نیشنل کمانڈ اینڈ کنٹرول آپریشن سنٹر نے  ایس او پیز جاری کردی  گئی ہیں۔ جس کے تحت اسٹیڈیم میں آنے والوں کو ایک میٹر کے فاصلےپر بیٹھنا ہوگا۔گراؤنڈ کے اندر اور باہر فیس ماسک پہننا لازمی ہوگا۔

واضح رہے کہ سپر لیگ میں چھ اسلام آباد یونائیٹڈ، دفاعی چیمپیئن کراچی کنگز، لاہور قلندرز، ملتان سلطانز، پشاور زلمی اور کوئٹہ گلیڈی ایٹرز کی ٹیمیں ٹائٹل کے لیے پنجہ آزمائی کریں گی۔  سپر لیگ سیزن 6 کا  یہ ایونٹ دو مرحلوں میں کھیلا جائےگا۔ 20 فروری سے 7 مارچ تک میچز کراچی میں ہونگے۔ دس مارچ سے دوسرا مرحلہ لاہور میں شروع ہوگا، جبکہ ایونٹ کا فائنل 22 مارچ کو قذافی اسٹیڈیم لاہور میں ہوگا۔کورونا وباء کے دوران تمام اسٹیک ہولڈرز کی صحت اور حفاظت کے پیش نظر 34 میچز پر مشتمل ایونٹ کراچی اور لاہور میں کروانے کا فیصلہ کیا گیا ہے۔