ایشیا کپ 2023 کی میزبانی پاکستان  کو مل گئی

تفصیلات کے مطابق ایشین کرکٹ کونسل (اے سی سی )کا اہم  اجلاس  ہوا ، اے سی سی میٹنگ کی صدارت بھارت کے جے شاہ نے کی۔  ایشین کرکٹ کونسل کے اجلاس میں ایشیا کپ 2023 کی میزبانی پاکستان کو دے دی گئی ہے۔ ایشیا کپ 2023 ون ڈے فارمیٹ پر کھیلا جائے گا۔

خیال رہے کہ  کورونا وائرس کے باعث 2020 اور 2021 کا ایشیا کپ ملتوی کر دیا گیا تھا،کورونا وائرس کے سبب ایشیا کپ ٹی 20 بھی ملتوی کردیا گیا تھا، ایشیا کپ سری لنکا میں شیڈول تھا۔ سربراہ سری لنکن کرکٹ بورڈ کا کہنا تھا کہ کورونا کے سبب ایشیا کپ کا انعقاد ممکن نہیں ہے۔

قبل ازیں  پاکستان کرکٹ بورڈ (پی سی بی)  کے چئیرمین رمیز راجہ کی بھارتی ہم منصب سارو گنگولی سے ملاقات ہوئی تھی،   رمیز راجا کی سارو گنگولی سے ملاقات اے سی سی کے اجلاس کے دوران ہوئی،   ایشین کرکٹ کونسل کا اجلاس دبئی میں ہوا تھا۔

ذرائع  کے مطابق   پی سی بی کے چیئرمین  رمیز راجہ کو آئی پی ایل کا فائنل دیکھنے کی دعوت دی گئی، کرکٹ بورڈز کے دو بڑوں کے درمیان غیر رسمی ملاقات میں خوشگوار ماحول میں ہوئی،  ملاقات میں ایشین بلاک اور باہمی کرکٹ کی بحالی پر تبادلہ خیال کیا گیا۔