بہاولپورمیں ٹریفک حادثہ ، ایک ہی خاندان کے 3افراد جاں بحق 

جی این این کے مطابق افسوسناک حادثہ  وہاڑی روڈ پر تحصیل حاصل پور میں پیش آیا۔ رکشے میں سوار بدقسمت خاندان شادی کی تقریب سے واپس آرہا تھا کہ رکشہ موڑ کاٹتے ہوئے الٹ گیا، الٹا ہوا رکشہ پیچھے سے آتے ہوئے  نامعلوم ٹرک کی زد میں آگیا ۔

حادثے کے نتیجے میں دوبچوں سمیت 3افراد موقع پر جاں بحق ہوگئے جبکہ 3زخمی ہوئے ہیں ۔ حادثے کی اطلاع ملتے ہی ریسکیو اور پولیس موقع پر پہنچ گئی اورلاشوں و زخمیوں کو قریبی اسپتال منتقل کردیا ۔ 

جاں بحق ہونے والوں میں چودہ سالہ احمد، پندرہ سالہ نسرین اور اٹھارہ سالہ مہرین شامل ہیں جبکہ زخمیوں کی شناخت بارہ سالہ احمد، پندرہ سالہ شہباز اور ستر سالہ منظوراں بی بی کے نام سے ہوئی ہے ۔ پولیس کے مطابق ٹرک کی تلاش جاری ہے ۔