کورونا وائرس : امریکہ کی دو ریاستوں میں پابندیاں ختم کرنے کا اعلان

غیرملکی میڈیا کے مطابق امریکی ریاست  ٹیکساس میں کاروبار اگلے ہفتے مکمل بحال کردیا جائے گا۔ٹیکساس  امریکہ کی بڑی ریاست بھی ہے  جس نے کورونا سے متعلق جولائی سے نافذ پابندیاں ختم  کرنے کا اعلان کیا ہے ۔ اس حوالے سے  ٹیکساس گورنر  کو پارٹی کی جانب سے سخت تنقید کاسامنا کرنا پڑ رہاہے ۔

اس ایگزیکٹو آرڈر  کے تحت  یہ  10 مارچ سے نافذ العمل ہوگا ، ماسک  پہننا ضروری نہیں ہو گا جبکہ ماسک  کی پابندی نہ کرنے پر شہریوں کو سزا  نہیں دی جائے گی ۔گورنر کا کہنا ہے   کہ ٹیکساس میں  بہت سارے  افراد کو روزگار  سے ہٹادیا گیا ہے اور بہت سے چھوٹے کاروباری مالکان اپنے بلوں کی ادائیگی کے لئے جدوجہد کر رہے ہیں لہذا  اسے ختم ہونا ضروری ہے۔ اس کے ساتھ ساتھ  امریکی ریاست   مسی سپی میں کل سے تمام کاروبار کھول دیا جائے گا۔

I just announced Texas is OPEN 100%.

EVERYTHING.

I also ended the statewide mask mandate.

— Greg Abbott (@GregAbbott_TX) March 2, 2021

ٹیکساس میں یہ اعلان اس وقت سامنے آیا جب مشی گن ، لوزیانا،  مسیسیپی سمیت دیگر ریاستوں میں بھی اسی طرح کے اقدامات  اٹھائے گئے ہیں۔   وبائی امراض کے دوران ملک کے بیشتر حصے ' ماسک  لازمی ' کے تحت زندگی بسر کر رہے ہیں ، کم از کم 37 ریاستوں میں  ماسک کی پابندی لازمی ہے  لیکن یہ احکامات  اب تیزی سے  کم کیے جارہے ہیں ۔

 دوسری جانب ریاستوں کے کورونا سے متعلق اقدامات واپس لینے پر ڈائریکٹر سی ڈی سی نے تشویش کا اظہار کیا ہے۔ انہوں نے کہا کہ سخت محنت کے بعد کورونا پر قابو پانے میں جو کامیابی حاصل کی اسے کھونے کا خدشہ ہے۔

امریکی صدر جو بائیڈن کا کہنا ہے کہ زندگی اگلے سال سے پہلے نارمل نہیں ہوسکے گی ، انہو ں نے واضح کیا کہ کورونا وائرس پرپابندی ابھی بھی ضروری ہے۔

واضح رہے کہ کورونا سے متاثرین ممالک کی فہرست میں  امریکہ  پہلے نمبر پر ہے ،  امریکہ میں کورونا سے مرنے والوں کی کل تعداد 5 لاکھ 29 ہزار 214 تک پہنچ گئی ہے جبکہ2 کروڑ 93 لاکھ 70 ہزار سے زائد متاثر ہیں۔

دوسری جانب عالمی وبا کورونا وائرس کے سبب دنیا بھر  میں 11 کروڑ 52 لاکھ 99 ہزار سے زائد افراد متاثر اور مرنے والوں کی تعداد 25 لاکھ 60 ہزار 602 ہو گئی ہے۔ دنیا بھر میں کورونا سے صحت یاب ہونے والوں کی تعداد 9 کروڑ 11 لاکھ 17 ہزار سے زائد  اور فعال کیسز کی تعداد 2 کروڑ 16 لاکھ سے زائد ہے۔