نئے پاکستان کا نعرہ لگانے والوں نے پرانے کو بھی تباہ کر دیا:حمزہ شہباز

تفصیلات کے مطابق مسلم لیگ ن کے رہنما اور پنجاب اسمبلی میں قائد حزب اختلاف حمزہ شہباز کا کہنا تھا کہ میں آج بھی مسلم لیگ ن کا کارکن ہوں،پاکستان تحریک انصاف نے قوم سے جھوٹے وعدے کیے اور آج گھروں میں فاقے ہیں۔

ان کا کہنا تھا کہ آج  لوگوں کے پاس نئے کپڑے بنانے کے لیے پیسے نہیں ہیں۔ نیا پاکستان بنانے والوں نے کہا تھا ایک کروڑ نوکریاں دیں گے لیکن آج بجلی کا بل ادا کرنے کے لیے لوگوں کے پاس پیسے نہیں ہیں۔

حمزہ شہباز کا کہنا تھا کہ آج لاکھوں لوگ بےروزگار ہو کر گھروں میں بیٹھے ہیں اسی لیے عمران نیازی سے مجھے نفرت نہیں لیکن ان پر غصہ ضرور ہوں کیونکہ نئے پاکستان کا نعرہ لگانے والوں نے پرانے کو بھی تباہ کر دیا۔

ان کا مزید کہنا تھا کہ مسلم لیگ ن جیلوں کا حساب نہیں مانگتی لیکن عوام کا احساس کریں اور سویلین بالادستی قائم ہونے تک جمہوریت کی گاڑی نہیں چل سکتی،یہ جعلی وزیر اعظم ہے جبکہ یہ ووٹ چور اور جھوٹا بھی ہے۔