شہبازشریف کی سال نو پر پٹرولیم مصنوعات کی قیمتوں میں اضافے کی مذمت 

تفصیلات کے مطابق پاکستان مسلم لیگ (ن) کے صدر اور قائد حزب اختلاف شہبازشریف  کا کہنا ہے کہ  نئے سال پر پٹرول بم پھینکنے سے بہتر تھا کہ عمران نیازی استعفی دے دیتے ۔ انہوں نے کہا کہ  دنیا میں حکومتیں خوشی کے تہواروں پراشیاءسستی کرتی ہیں، عمران نیازی نے مہنگائی کا بم گرادیا ، پی ٹی آئی حکومت کو عوام کی سال نو پر خوشی بھی برداشت نہیں ہوئی۔ 

انہوں نے کہا کہ  موجودہ حکومت کا دوسر ا نام ظلم، استحصال اور بے حسی ہے ، عوام کو زندہ درگور کرنے کے بجائے عمران نیازی مستعفی ہوجائیں، اپنی حماقتوں کی سزا قوم کو نہ دیں۔ 

شہباز شریف نے مزید کہا کہ نئے سال میں قوم کو مہنگائی، معاشی تباہی اور بے روزگاری سے بچانے کے لئے ظالم حکومت سے نجات پانا ہوگی ۔

انہوں نے کہا کہ  اللہ تعالیٰ سے دعا ہے کہ نیا سال قوم کو مہنگائی، بدانتظامی، معاشی بربادی، بھوک، بیماری، ظلم و ناانصافی کے عذابوں سے نجات کی شروعات کا سال بن جائے۔