رواں سال پاکستان کے استحکام کا سال ہوگا:فواد چوہدری

وفاقی وزیر اطلاعات فواد چودھری نے کراچی میں پی ٹی آئی رہنما عالمگیر خان کے والد کے انتقال پر تعزیت کے بعد میڈیا سے گفتگو میں کہا کہ نواز شریف کی واپسی کے لیے اٹارنی جنرل کو وزیر اعظم نے عدالتی کارروائی کی ہدایت دی ہے،شہباز شریف نے نواز شریف کی واپسی کے حوالے سے حلف نامہ جمع کرایا تھا۔

ان کا کہنا تھا کہ 30 سال کے اقدامات کو 3 سال میں بہتر کرنا ممکن نہیں ہے۔ ہم نے اسلام آباد کا شہر بنایا اور گوادر میں کام کیا اس کے علاوہ  صنعت کو بھی بہتر کیا ہے۔ ہم نے 55 ارب ڈالر واپس کرنے ہیں لیکن اس کے باوجود ملک کو ہم نے پاؤں پر کھڑا کیا۔

فواد چوہدری کا کہنا تھا کہ اسٹیٹ بینک کا بورڈ آف گورنر پاکستان حکومت نے لگانا ہے۔ عالمی سطح پر تیل کی قیمتیں کم ہوتی ہیں تو یہاں بھی کم کر دیئے جاتے ہیں لیکن اب تیل کی قیمتیں عالمی سطح پر بڑھ گئی ہیں۔ اب ہر جگہ یوریا کا مسئلہ ہے اور منشیات سے زیادہ یوریا کی اسمگلنگ میں پیسہ ہے،پاکستان میں جتنی سستی یوریا مل رہی ہے اتنی دنیا میں کہیں نہیں ملتی۔

ان کا کہنا تھا کہ پنجاب میں صحت کارڈ کی سہولت فراہم کر دی گئی ہے اور اب عوام نجی اسپتالوں سے بھی علاج کراسکیں گے،سندھ حکومت کو بھی چاہیے کہ وہ صحت کارڈ کا منصوبہ شروع کریں۔

ان کا مزید کہنا تھا کہ اب بلوچستان میں بھی صحت کارڈ کا منصوبہ شروع ہونے جا رہا ہے،وزیر اعلیٰ سندھ مراد علی شاہ نہ جانے کیوں سندھ کے لوگوں سے کون سا بدلہ لے رہے ہیں۔