ایک عمرے کے فوری بعد دوسرے عمرے کی سہولت ختم

سعودی عرب میں کورونا وائرس کے پھیلاؤ میں تیزی سے اضافہ ہورہا ہے ، جس کے پیش نظر حرمین شریفین میں ایک بار پھر پابندیاں عائد کردی گئیں ۔ سعودی وزارت حج وعمرہ کے مطابق کورونا کے بڑھتے کیسز کو مدنظر رکھتے ہوئے یہ فیصلہ کیا گیا ہے ۔

فیصلے کے تحت  اب ایک عمرے کے بعد 10 روز کا وقفہ لازمی قرار دے دیا گیا ہے۔ حکام کے مطابق 10روز سے کم وقفے پر عمرے کا اجازت نامہ جاری نہیں کیا جائے گا۔

وزارت حج وعمرہ کی جانب سے  طواف کےلئےپہلی منزل مختص کردی گئی ہے جبکہ  عمرہ اورنمازکے اجازت نامے مقامی شہریوں کے ساتھ ساتھ غیرملکی اور وزٹ ویزا ہولڈر کو بھی جاری کیے جارہےہیں ، ایپ کےذریعے جاری کسی بھی اجازت نامے پر کوئی فیس نہیں ہے ۔

خیال رہے سعودی عرب میں اگست 2021 کے بعد یومیہ کورونا کیسز کی تعداد ایک ہزار سے متجاوزہوچکی  ہے اور کورونا کیسز پانچ ماہ کی بلند ترین سطح پر پہنچ چکے ہیں ۔