سپریم کورٹ نے 8 سالہ بچے سے زیادتی کے ملزم کی درخواست ضمانت خارج کردی

تفصیلات کے مطابق سپریم کورٹ نے 8 سالہ بچے سے زیادتی کے ملزم فخرالاسلام کی درخواست ضمانت خارج کردی ہے، نامزد چیف جسٹس عمر عطا بندیال کی سربراہی میں تین رکنی بینچ نے کیس کی سماعت کی۔

عدالت نے ملزم کے وکیل کی جانب سے درخواست ضمانت واپس لینے پر خارج کی،  عدالت نے  ٹرائل کورٹ کو سماعت جلد مکمل کرنے کا حکم دینے کی استدعا بھی مسترد کردی۔

وکیل ملزم کا کہنا تھا کہ  میرا موکل 5 ماہ سے جیل میں ہے،  جرم کی زیادہ سے زیادہ سزا 7 سال ہے ضمانت دی جائے۔

جسٹس منصور علی شاہ نے کہا کہ   ملزم پر 8 سالہ بچے کیساتھ جنسی زیادتی کا الزام ہے، ملزم پر لگے الزام کو عدالت کو دہرانا بھی نہیں چاہتے۔

نامزد چیف جسٹس عمر عطا بندیال نے کہا کہ  جو جرم ملزم نے کیا ہے اسکی سزا 14 سے 25 سال کی سزا ہے، ملزم فخر الاسلام نے جو گند کیا ہے وہ بھی فیصلہ میں لکھیں گے۔