پی ڈی ایم نے چیئرمین سینیٹ کیلئے یوسف رضا گیلانی کے نام کی منظوری دے دی

تفصیلات کے مطابق : پی ڈی ایم سربراہی اجلاس  آج اسلام آباد میں منعقد ہوا، پاکستان ڈیموکریٹک موومنٹ (پی ڈی ایم ) نے چیئرمین سینیٹ کیلئے سابق وزیر اعظم یوسف رضا گیلانی کے نام کی منظوری دے دی۔ سابق صدر آصف زرداری نے ابتدائی کلمات ادا کئے۔سابق صدر آصف زرداری نے سینیٹ میں پی ڈی ایم کے متفقہ امیدوار سید یوسف رضا گیلانی کی کامیابی پر مبارک باد دی۔

چیئرمین پی پی بلاول بھٹو زرداری کا کہنا ہے کہ  چار روز بعد چیئرمین سینیٹ کے انتخابات ہونا ہیں، ایجنڈے میں یہ معاملہ سرفہرست ہونا چاہیے،پاکستان کی جمہوری قوتوں کو یوسف رضا گیلانی کی جیت سے ایک امید ملی، ہم چاہتے ہیں کہ چیئرمین سینیٹ کا الیکشن جیت کر ایک اور فتح اپنے نام کریں،پاکستان پیپلزپارٹی پی ڈی ایم کے روڈ میپ کے ساتھ کمٹڈ ہے۔

نو منتخب سینیٹر یوسف رضا گیلانی  نے کہا کہ  میں پی ڈی ایم کی تمام جماعتوں کا ممنون ہوں اور یہ کامیابی ان کے نام کرتا ہوں، الیکشن سے پہلے آپ کی کمال حکمت عملی نے حکمرانوں دوڑیں لگوا دی تھیں،آپ کی اس کامیابی سے اقتدار کے ایوانوں می لرزہ طاری ہے،حکمرانوں کو یہ شکست ہضم نہیں ہو رہی ہے۔