رینجرز اور پو لیس کی اورنگی ٹاؤن میں کارروائی ، اسلحہ اسمگلنگ گروہ کے 3کارندے گرفتار

تفصیلات کے مطابق  رینجرز اور پو لیس نے اورنگی ٹاؤن میں کارروائی کی ہے۔ترجمان رینجرز کا کہنا ہے کہ  بین الصوبائی اسلحہ اسمگلنگ گروہ کے 3کارندے گرفتار کرلیے گئے ہیں ، گرفتار ملزمان میں عطاء اللہ، عرفان اور فیاض شامل ہیں، ملزمان کے قبضے سے 11 پستول، 22 میگزین  اور ایک ویپن پنچ ٹول برآمد کیا گیا۔

ترجمان رینجرز کے مطابق  ابتدائی تفتیش کے دوران ملزمان کا سوشل میڈیا کے مختلف پلیٹ فارمز کا استعمال کر کے لوگوں کو اسلحہ فروخت کرنے کا اعتراف کیا ہے، ملزمان خیبر پختونخوا سے غیرقانونی طریقے سے اسلحہ سندھ اور پنجاب کے مختلف شہروں میں مسافر بسوں کے ذریعے اسمگل کرتے تھے، اس سے پہلے بھی ملزمان کی اسلحہ کھیپ پشاور موٹر وے اِنٹر چینج کے قریب پکڑی جا چکی ہے۔ گرفتار ملزمان عادی مجرم ہیں اورمتعدد بار جیل بھی جا چکے ہیں، ملزمان کوبمعہ برآمد شدہ اسلحہ اورایمونیشن مزیدقانونی کاروائی کے لیے پولیس کے حوالے کردیا گیا ہے۔