پاکستان ایک پرامن اور مستحکم افغانستان چاہتا ہے، وزیراعظم

وزیراعظم عمران خان کی زیر صدارت ایپکس کمیٹی برائے افغانستان کا چوتھا اجلاس ہوا، جس میں   مشیر ڈاکٹر معید یوسف، عبدالرزاق داؤد، ڈاکٹر فیصل سلطان اور اعلیٰ سول اور فوجی افسران شریک ہوئے۔ مشیر ڈاکٹر معید یوسف نے ایپکس کمیٹی کو افغانستان کے حوالے سے تفصیلی بریفنگ دی۔

وزیر اعظم عمران خان نے کہا کہ  افغان طلباء کو وظائف افغانستان کی ترقی میں اہم کردار ادا کرنے کے لیے ہے، افغانستان کے لیے تجارت، ہیلتھ کیئر اور مواصلاتی منصوبے ترجیح ہے۔ پاکستان ایک پرامن اور مستحکم افغانستان چاہتا ہے، عالمی برادری کو انسانی بحران سے بچنے میں مدد کرنی چاہیے۔

 وزیراعظم نے کہا کہ  پاکستانی یونیورسٹیوں میں زیر تعلیم افغان طلباء افغانستان کی ترقی میں اہم کردار ادا کرنے میں مدد کریں گے،  دونوں ممالک کے درمیان عوام سے عوام کے روابط کو مضبوط بنانے میں مدد کریں گے، افغان طلبا کے وظائف جاری رکھے جائیں اور تمام ضروری وسائل دستیاب کیے جائیں۔ان کا مزید کہنا تھا کہ  پاکستان ان ہسپتالوں کی حمایت کرے گا جن کی تعمیر میں پاکستان نے افغانستان کی مدد کی تھی۔